Aruba a registrá su promé morto den tráfiko

ORANJESTAD.- Aruba a registrá su promé kaso di morto den tráfiko. Ta trata di un aksidente ku a tuma lugá den e mardugá di djasabra ora ku pa mas o ménos 03:46 sentral di polis a haña notifikashon di un aksidente ku a tuma lugá na altura di e rotònde di Super Food. E promé patruya ku a yega na e sitio a topa ku un outo Hyundai Elanta ku a bòltu.

Tabata nesesario pidi yudansa di brantwer i ambulans mirando situashon kon e víktima a keda pegá den e outo. A kòrta e outo habrié i a logra saka e víktima. Personal di ambulans presente a trata na duna e shofùr asistensia médiko pero lamentablemente no a logra. Dr.Texier a konstatá morto pa 04:50 di Ferdinand Samuel Jonathan Hsing nasé na Aruba dia 20 di yüli 1987.

Spesialistanan di tráfiko a presentá na e sitio pa hasi nan investigashon meskos tambe slachtofferhulp ku a duna guia na e famia. Segun informashon kompilá, e hòmber Hsing a sali un fiesta di trabou. Ta trata di un trahadó di RBC Bank Aruba.

SHARE

LEAVE A REPLY