Ta trata e keho entrega pa Carlos Monk

WILLEMSTAD.- Ei investigashon di Landsrecherche tokante di suministro di informashon di Banko Sentral di Kòrsou i St.Maarten a keda entregá na outoridatnan di Aruba. Ministerio Públiko Kòrsou a entregá e investigashon di Landsrecherche Curaçao pa ku e suministro di informashon dor di Banko Sentral, na Ministerio Públiko Aruba, pa asina garantisá e integridat, independensia i imparsialidat di e investigashon.

Riba 14 di mei 2019, Landsrecherche Curaçao a risibí un denunsia dirigí kontra di Banko Sentral di Kòrsou i Sint Maarten, di parti di señor Monk. E denunsia ta referí na e supuesto infrakshon di e lei di screening i di e deber di konfidensialidat konforme ku e Ordenansa Nashonal di Supervishon di sektor Bankario i di Krédito 1994, mirando ku lo a kompartí informashon konfidensial den kuadro di e kandidato pa minister (red. Neysa Isenia).

Landsrecherche Curaçao a inisiá un investigashon relashoná ku e denunsia aki, riba órden di Prokurador General (PG). Ainda no a terminá e investigashon aki ku Landsrecherche ta ehekutando. Mas detaye den edishon di EXTRA.