ORANJESTAD.- Promé minister di Aruba sra. Evelyn Wever-Croes a reakshon fuertemente riba rumornan ku ta sirkulá spesialmente na Aruba den kua ta bisando ku gabinete Wever-Croes lo ta dunando amnistia na hendenan sin status legal na Aruba.
Tantu Aruba, Boneiru i Kòrsou ta konfrontando hopi problema ku gran kantidat di venezolanonan ku ta yega e islanan aki buskando un mihó bida. Ya kaba tabatin bastante kaso kaminda outoridatnan di tur e tres islanan aki ta deportá gran kantidat di venezolanonan ilegal. Den último dianan informashon a kuminsá sirkulá indikando ku gobièrnu di Aruba si lo ta dunando amnistia venezolanonan ilegal riba e isla.
Komo konsekuensia di esaki tantu ayera komo awe hopi di e venezolanonan ilegal a baha bai e servisio di imigrashon di Aruba, Dimas, pa einan registrá buskando asina pa haña amnistia. Sinembargo einan outoridatnan mester a splika nan ku esaki no ta e kaso i ku ta trata di informashon inkorekto.
Esaki mes a pone ku Promé minister arubano a disidí di saka un informe ofisial den kua ta splika ku niun momentu so Aruba ta dunando amnistia na hendenan sin un status legal.