ORANJESTAD.- Aruba ta habri frontera bèk pa paisnan Latinoamerikano manera Colombia entrante 1e di desèmber próksimo. Asina CEO di ofisina di turismo na Aruba (ATA) Ronella Tjin Asjoe-Croes a anunsiá djaluna anochi. Fuera di Colombia, tin México, República Dominicana i Haiti. Pa Venezuela si ta keda será ainda. Ku e re-apertura aki, ta spera un total di entre 2000 pa 2500 bishitante pa luna èkstra.

El Dorado International Airport, Bogota

Tambe a anunsiá ku no ta distinguí kambio di zona di bishita for di Merka, esta ku no ta distinguí bishita for di ‘hotzone’ òf no ‘hotzone’, entrante 1e di novèmber otro siman. Ku esaki, ta kere ku por logra 7 mil èkstra turista pa luna kuminsando novèmber.
Ronella Tjin Asjoe-Croes a bisa ku Merka ta keda merkado primario. Te awor aki ora ku a habri pa Merka a hasi distinshon di esnan ku ta ‘hotzones’ i esnan ku no ta ‘hotzones’. Un ‘hotzone’ ta kaminda ku tin mas kaso i medidanan nesesario promé ku un turista bin Aruba. Entrante 1e di novèmber no ta bai tin e distinshon aki mas.