WILLEMSTAD. - E akusadonan Sherwin (Pumpi) Pieters (19) i Druwently (Droopi) Pieter (28) kondená na 15 aña i Liang Wu (22) kondená na 8 aña pa kaso asesinato Solar mihó konosí komo “De Zon”, tabata den korte di apelashon pa oudiensia preliminar, despues ku nan a apelá nan sentensia.
Ta trata di e kaso di asesinato ku a tuma lugá dia 22 di yüni 2019, kual e víktima Idrick Sebastian Francisca a keda likidá.
E hòmbernan ta para fuerte riba nan inosensia i ta bisa di no tin nada di aber ku e asesinato. Segun e akusadonan, Nivillac ta gaña riba nan.
E ko akusado Nivillac, ta esun ku a konta detayadamente bou di huramentashon, kon tur kos a bai riba e dia ei.
Durante un kaso ku a keda trata pro forma anteriormente, Nivillac a lanta i bisa hues ku Droopi i Pumpi ta esnan ku a tira e víktima mata inosentemente.
Segun Nivillac, nan a haña arma serka Wu i kaba e lachi riba e víktima ku a resultá inosente.
Nivillac a atmití ku e tambe tabatin un arma di kandela ku el a tira den laira kuné e anochi ei, pero despues a bai kas promé ku e asesinato a tuma lugá.
Polisnan ku a studia e imágennan di kámara, a rekonosé e akusadonan i a traha algun senario ku posiblemente a kuadra ku loke Nivillac a deklará. Nivillac ku a keda kondená na 24 luna di prizòn, aktualmente ta den libertat.
E defensa ta para riba ku no por prueba ku nan klientenan a kometé e asesinato i no por bai solamente tras di palabra di Nivillac.
Mirando esaki nan a apelá e sentensia.
Durante tratamentu di e kaso, Wu a bisa ku e ta será kasi 2 aña inosentemente. Segun e akusado, e no tabatin arma i nunka tabata den poseshon di niun arma manera nan ta akus’é di dje.
Pieters a bisa ku e ta será inosentemente i tin 2 aña será sin ku por wak su yu i sin mi por hasi nada ku su bida.
Pieter den su kaso a bisa e tribunal di Hof, pa wak e kaso bon, paso nan tur ta inosente será. El a bisa ku Nivillac a gaña riba tur hende.
Abogado di Wu a pidi pa skucha Pieters komo testigu.
E abogado di Pieters, mr Dickes, a pidi un rapòrt di Reclasering, pa mira e situashon personal di e akusado.
E abogado a bisa ku e ke rapòrt sikiátriko i tambe pa wak si su kliente ta kai bou di lei pa hóbennan.
E kaso lo keda trata pro-forma un bia mas dia 7 di òktober binidero i lo keda tratá den su kontenido na yanüari 2020