WILLEMSTAD.-E informe ofisial di polis ta indiká ku awe djamars 29 di yanüari 2019, alrededor di 08.16 or, Sentral di Polis a risibí notifikashon ku den un buraku banda di un brùg den área di Baya Beach a topa ku un hòmber drumí ku no tabata duna señal di bida. Mesora Sentral a dirigí unidatnan na e sitio. Na yegada di e patruya, e agentenan a tuma nota ku ta trata di un persona di edat, di sekso maskulino ku vários hinká na e parti ariba di su kurpa drumí den e buraku. Ta trata di un hòmber di edat koló skur, kabei pelá plat i ku postura normal. Alrededor di 09.45 or dòkter di polis ku a presentá na e sitio, a konstatá morto di e hòmber. Riba òrdu di Fiskal di Ministerio Públiko a konfiská e kurpa sin bida pa mas investigashon.

Un kantidat hopi grandi di polis i recherche ta den e área di Baya Beach. Esaki ta relashoná ku e kaso di un hòmber morto ku a haña den e área. Tur kos ta indiká ku ta trata di un kaso di asesinato. EXTRA tabata hopi tempran na e sitio i e imágennan ku nos a kapta ta bastante fuerte i p’esei nos a wanta nan. Banda di polis i recherche tin brantwer, dòkter di polis, patólogo i hopi otro funshonario mas.

Den kombersashon ku bosero polisial Imro Zwerwer el a splika EXTRA ku te na e momentunan aki no por duna muchu detaye. Ta awor e investigashon a kuminsá, sinembargo e bosero polisial a indiká ku no por bisa si ta trata di un hende lokal òf ekstranhero. Manera EXTRA a informá kaba e hòmber tin basta kòrta na su kurpa. Zwerwer a bisa tambe ku tin indikashon fuerte ku probablemente e akto no a tuma lugá na e sitio unda a haña e hòmber, pero ku deskonosínan a bai benta e kurpa sin bida den un buraku na Baya.

Riba e pregunta di EXTRA kiko por bisa ku e hòmber su parti delikado ta kòrta, kita afó e bosero polisial a duna di konosé ku e tambe a tende esei, pero e mes no a mira debí ku e no a yega serka.

WILLEMSTAD.-Un ratu pasa outoridatnan a na Baya Beach unda a topa ku un hòmber benta den mondi. E hòmber no ta duna señal di bida mas. Bastante polis ta na e sitio pa asina kuminsá ku e investigashon nesesario. E promé informashon for di e sitio ta ku e hòmber ta mustra sena di maltrato i e ta tur na sanger. Tambe por a mira ku a kòrta e parti delikado di e hòmber kit’e afó. Keda pendiente pa mas detaye.