I no di agensia aki na Kòrsou

WILLEMSTAD.- Kuerpo Polisial di Kòrsou a pone énfasis riba ladronisia di outo lokual ta alarmante riba nos isla.

Ta hasi menshon di vários marka i modèl di outo ku ta esnan ku mas tantu ta keda hòrtá.

Curaçao Car Dealer Association den reakshoná na EXTRA ta bisa ku mayoria di e outonan hòrtá aki ta outonan importá i no kumprá lokalmente na agensia.E asosashon ta representá 12 agensia di outo na Kòrsou i den nan tin e vehíkulonan ku polis ta menshoná nan marka.

Loke hopi hende no ta konsiente di dje, ta e echo ku e outonan ku ta keda hòrtá, ta esnan mas bendé mundialmente.

E echo ku tin hopi di e outonan aki, ta bira atraktivo pa malechornan trese outo kibra Kòrsou i hòrta piesanan pa drecha esaki. Un punto hopi importante tambe ta, ku mayoria di e outonan ku ta keda hòrtá, ta esnan ku ta keda importá. Pues no outonan kumprá na agensia.

Ya pa 8-9 aña fábrikanan di outo a hisa nan seguridat di outo. “Imobilizer” ta un di e métodonan. Outonan ku ta bini for di afó, no tin esaki. Lógikamente ta bira mas fásil pa malechornan hòrta e vehíkulonan aki.

Otro problema grandi ku tin, ta e echo ku kompanianan ku ta traha yabi èkstra no ta eksigí identifikashon di klientenan, esaki segun CCDA den entrevista eksklusivo ku EXTRA. Malechornan ta yega na e kompanianan aki pa asina “clone” e imobilizer pa por traha yabi èkstra. E kompanianan ku ta traha yabi, no ta eksigí ningun klase di identifikashon pa por kompará esaki ku e karchi di kùr.

Esaki tambe ta hasi trabou di e malechornan fásil i nan no ta keda deskubrí.

Finalmente organisashon di agensianan di outo ta bisa ku klientenan no mester tin miedu di kumpra outo na agensianan aki na Kòrsou. Tur agensia ta sòru pa nan vehíkulonan tin tur seguridat nesesario pa asina evitá di por keda hòrtá.