WILLEMSTAD – Tabata 16 Yüli 2021 ku un kas di un siudadano di 96 aña di edat a kima den e bario Brievengat Nobo.

E kousa di e kandela a keda deskonosí te ku awe. Ademas di e kandela di e kas, tabatin dañonan di huma i awa. E abitantenan di e kas a pèrdè tur e loke nan ku nan tabatin den e kas. Segun Atherly La Bast, Presidente di Asosiashon Bario Brievengat (ABB), doño di e kas ta Gobièrnu ku na aña 1973, 49 aña pasá, a hür e kas ku e siudadano. “Representante di Gobièrnu, Fundashon Kas Popular, a bin tuma nota di e loke ku a pasa i a pidi pa laga tur kos para pa seguro por atendé. Sinembargo nunka mas FKP no a duna kara na e famia embolbí. No tabatin niun trahadó sosial embolbí pa por a asistí e famia den e situashon prekario i direpente ku nan a haña nan aden.”

Segun e presidente di ABB a papia ku sr. Arthur Con, Direktor di FKP, i esaki tampoko no a duna niun klase di resultado.

“FKP i Gobièrnu ni sikiera a ofresé un otro kas temporalmente p’asina e bida di e famia por a kontinuá i por a regresá nan kas bèk ora kaba ku restourashon di esaki.”

E siudadano di edat avansá (96) mester a buska obligatoriamente refugio serka un yu i pa motibu di poko espasio den e kas di e yu, mas lat mester a hib’e kontra boluntat di famia na un kas di ansiano ku e intenshon p’e regresá su kas bèk. Bisiña ku a tene konsiderashon ku e situashon repentino a duna e ñetu un estadia temporal den nan kas. I miéntras tantu a pasa mas ku un aña i e bisiña tambe a pidié pa bai buska un otro sitio pa biba. E ñetu aktualmente a bai keda bèk, kontra su boluntat, den e ruina a-higiéniko di e kas. Segun ABB pa kolmo, siendo ku e kas a keda den e estado kima i no tabatin niun klase di servisio, Fundashon Kas Popular, a sigui kobra e hür normalmente pa un periodo basta largu i nunka mas a duna kara i bin splika nada tokante e kandela i e kas. Konsekuentemente asina a laga tur hende di e kas riba kaya.

E keho a yega serka Asosiashon Bario Brievengat (ABB). Segun investigashon a bin sali na kla ku tur propiedat di Gobièrnu ta sigurá i ku seguro e ora ei mester a hasi kuenta. “No tin apertura di niun manera ni serka Gobièrnu ni serka FKP pa por resolvé e problema reinante ku ta kousando pa mas ku un aña problemanan serio p’e famia i tambe molèster pisá den e propio bario Brievengat.”

Ta p’esei ABB ta urgi tantu Gobièrnu i Fundashon Kas Popular pa kumpli ku Bon Gobernashon i pa den 2 bes 24 ora: Desalohá e kas ku ta den un situashon a-higiéniko i ta forma un bista desagradabel den e bario; Restourá e kas p’asina e famia ku tin 49 aña ta hür e kas por kontinuá den e kas; Traspasá e kas komo propiedat konforme e deseo ferviente fo’i aña 1990 di e siudadano enbolbí. E situashon reinante a hiba e kalidat di bida di e siudadano di 96 aña di edat hopi atras i médikonan ta teme pa durashon di su bida.