WILLEMSTAD.- Ayera tardi 3:30 tabatin un kore kore formal na prisòn, despues ku polis a haña mèldu ku tin bòm den kantor di direktor di prisòn.
Mesora e unidat spesial di polis ku ekspertonan den asuntu di bòm a bai prisòn. A sera e área, miéntras e tim spesial a drenta akshon unda e mèldu a keda señalá. Despues di búskeda intensivo, no a topa nada manera e mèldu ta bisa.
Polis ta bisa ku ta trata di un bos maskulino ku a yama sentral di polis mèldu e bòm falsu.
No ta promé biaha e tipo di meldunan aki ta drenta. Den pasado esei a sosodé, pero polisnan a logra di pone man riba esun ku a kometé e delito aki tambe. Hasta e personanan a keda hiba dilanti di wes i a haña kondena.
Pues den e kaso aki por spera ku pronto polis lo pone man riba esun ku a hasi e mal chansa aki di mèldu bòm ku a resultá di ta algu falsu.