WILLEMSTAD.- Un dokumento sumamente interesante ta loke a sali for di e ministerio di finansa i GMN ku ta trata e situashon di indokumentadonan na i pa Kòrsou. Ta referí aki na e preshon enorme ku nan ta pone riba kaha di gobièrnu entre otro na gastunan di malesa. Mester atendé nan pero komo nan ta indokumentá no ta kontribuí na primanan sosial i p’esei e dokumento ta papia di atendé ku e situashon di indokumentadonan huntu i ku vigor.

Na 2023, e komunidat a sigui kremp te yega na un nivel di 148,925 residente. Esaki tambe tin un impakto riba kresementu ekonómiko di Kòrsou, i di e manera ei, riba entrada di impuesto i di primanan riba término largu. Migrashon por kontribuí positivamente na kresementu di poblashon i asina tambe na kresementu ekonómiko i sostenibilidat di e sistema di seguridat sosial. E migrantenan indokumentá ta prinsipalmente den e rango di edat ku nan ta produktivo ainda, esaki mirando ku nan no por reklamá servisionan sosial na Kòrsou.

E posibilidat pa traha legalmente na Kòrsou no solamente ta kontribuí na e oumento di entrada di impuesto i di primanan, pero tambe ta kontribuí na "nivelá e kampo di wega" relashoná ku e poblashon mes, pasobra dunadónan di trabou mester retené i paga impuesto i primanan pa e migrantenan aki i e leinan laboral ta apliká tambe pa e migrantenan. Pa invershonistanan riba e isla, esaki ta nifiká ku nan por usa e grupo di empleadonan aki legalmente pa yena vakaturanan ku ta difísil pa yena. Asina, e disponibilidat di personal sufisientemente kualifiká por tin un efekto positivo riba e invershonistanan nobo i tambe riba e "produkto Kòrsou" komo destinashon pa turistanan.

Pa e poblashon migrante ku aktualmente ya a biba hopi biaha den insertidumbre pa añanan, traha legalmente ta nifiká dal un paso importante pa un mihó futuro. No por traha legalmente ta trese e riesgo di eksplotashon (seksual). Den bista di nos propio pasado, nos no mester sera nos wowo riba esaki.

Nos ta selebrá nos liberashon for di sklabitut tur aña riba 17 di ougùstùs, i na mes momentu, nos no por permití formanan di sklabitut moderno pasa dilanti nos wowo. Tur ser humano tin derecho riba un eksistensia digno. Inseguridat sosial di migrantenan tambe tin komo konsekuensia tin biaha ku no tin otro salida ku komportashon kriminal òf prostitushon, asuntunan ku tin un impakto negativo riba nos sosiedat.

Brinda perspektiva na tur hende den sosiedat di Kòrsou ta algu ku mester enfoká riba dje den tur forma posibel i ku kua Kòrsou a komprometé su mes pa medio di e Ophetivonan di Desaroyo Sostenibel di Nashonnan Uní. Redukshon di pobresa, hamber i peligernan pa salú ta parti di esaki. P'esei ta importante pa trata e asuntu di e indokumentadonan awor huntu (finansa, GMN, SOAW i Hustisia) i ku vigor.