WILLEMSTAD.- Den último dianan por a tuma nota ku atrobe e kantidat di adiktonan den sentro di siudat ta bastante. Por nota ku nan ta drumi na diferente parti i te kasi mèrdia ainda nan ta drumi pegá ku edifisionan importante òf otro sitionan unda nos hendenan lokal i tambe turista ta trafiká. Esaki a pone ku esnan den turismo a hala atenshon di EXTRA riba e problema aki, tratando na haña atenshon di outoridatnan konserní.

Turismo ta e pila ekonómiko mas fuerte awor aki pa loke ta trata ekonomia di Kòrsou i esnan ku ta partisipá den e sektor aki ta ekspresá nan preokupashon pa situashonnan ku nan ta topa den kaya. E problema di adiktonan ku ta kana den sentro di siudat no ta algu ku ta Kòrsou so konosé, paisnan grandi i desaroyá ta konfrontá mesun problema. Paisnan bisiña ta opta pa un anochi prome buska tur adikto i hiba nan un sitio basta leu. E dia siguiente na momentu ku tin kantidat di turistanan di kruseronan den nan sentro di siudat e turistanan lo no mira ni sinti molèster di e adiktonan. Ta tuma tempu pa e adiktonan kana i yega sentro di siudat atrobe i pa e ora ei mayoria turista a subi nan barku bek kaba. Na Kòrsou e situashon ta unu ku meresé atenshon.

EXTRA a hasi bastante esfuerso pa haña kontakto ku e gerente di Fundashon pa Maneho di Adikshon (FMA) pero nos esfuersonan no a duna fruta. Buskando informashon riba e materia aki EXTRA a topa ku e relato anual 2018 di e fundashon. FMA su relato anual ta mustra kon nan a logra pasa den e aña 2018 despues ku a kòrta 230 mil florin for di nan supsidio di 3.344 mil florin (3.4 mion).

E gerente general Meta Fahrenfort den e relato ta indiká ku 75% di e plaka ku nan ta haña na supsidio ta bai pa paga salario di e profeshonalnan ku ta atendé ku e klientenan. E problema ta ku mei mei di aña gobièrnu a bolbe klaba nan ku mas kòrtamentu riba nan supsidio loke a hinka nan den mas problema finansiero. EXTRA ta keda pendiente kontakto ku e gerente general.

Awor aki tin pendiente un posibel fushon entre FMA i Stichting GGZ Curaçao. FMA ta kontentu ku e inisiativa ei pasobra e lo por nifiká un solushon pa FMA, sigur si tur e parti aki bai kai bou di Bureau Telecommunicatie & Post(BTP) manera minister di Salubridat, Medio Ambiente i Naturalesa a laga vislumbrá. Nan tin e speransa ku ora BTP komo instansia independiente tin e maneho finansiero ku kosnan lo por kana mas mihó pa nan.

E punto ta ku adiktonan no ta hañando muchu atenshon ni kuido. EXTRA ta kòrda kon den tempu di Lesley Roosberg a krea sentronan pa adiktonan, kaminda sikiera nan por a kana drenta pa baña, kambia paña, kome i tin bia asta por keda drumi. Tur eseinan no tei mas pasobra mester a kòrta debí na falta di plaka. Tanten e adiktonan ta sigui kana riba kaya, i e Kòrsou ku ta propagandá su sentro di siudat bunita i históriko tin adiktonan ta drumi di dia kla den kaya na sitionan krusial.