Robo riba mashinnan di plaka ta parse akto di krímen organisá

WILLEMSTAD.- Relashoná ku e kiebro di ATM di ACU EXTRA tabata den kombersashon ku presidente di Algemene Spaar- en Kredietcooperatie (ACU) sr. Angelo Davelaar i el a splika EXTRA ku ta opvio ku tin un grupito di hende ku ta determiná pa kibra mashinnan di plaka na Kòrsou pa saka sèn. A purba na mashin di Banco di Caribe, a purba i logra ku mashin di MCB i awor a sigui pa ACU. Ta importante pa outoridatnan kuminsá investigá e fenómeno aki.

Ta e mesun modus operandi ku e malechornan a purba primeramente ku Banco di Caribe i despues ku MCB si nan a logra. Den kaso di ACU su ATM e ta un tiki diferente ounke nan a hasi praktikamente e mesun sistema ku nan a hasi na tur e otro bankonan. Den kaso di e mashin di plaka di ACU, despues di e bula e porta nan a topa otro opstákulo ku a stroba nan entrada pa yega na e mashin. Esei a pone ku ladronnan a disidí di purba drenta via d e ATM mes.  Na e sitio por a mira T-shirt kibra na e entrada i tambe tabatin sèn plamá den e espasio. Davelaar ta kere ku e malechornan probablemente a logra bai ku algu di sèn. E echo ku nan a topa opstákulo pa drenta den e espasio a pone ku nan a kousa otro destrukshon pero ta difísil pa mes ora indiká kuantu sèn nan lo a bai kuné.

Na e sitio funshonarionan di ACU a kolekta tur sèn ku a keda plamá den e hòki i den e kaha fuerte dje mashin, hinka esakinan den un ènvelòp seyá i laga Panamericano bai ku e plaka aki mesora. Tabata peligroso pa bai hasi konteo di plaka na e sitio. Den dianan ku ta bini e funshonarionan lo bai konta sèn pa haña sa kiko ta e montante ku posiblemente nan a bai kuné.

Relashoná ku e situashon aki ACU a tuma e desishon mesora ku ta sera algun di e mashinnan di plaka. Ta bon pa sosionan tene bon na kuenta ku tin ATM di ACU ku lo ta sera pero tin algun ku lo sigui den operashon. EXTRA ta komprondé ku tin mas instituto finansiero ku sea ta sakando mashinnan di plaka for di servisio komo forma di prekoushon.

 

WILLEMSTAD.- Polis ta informá ku awe djasabra 5 di yanüari 2019, alrededor di 03.51’or di mardugá, Sentral di Polis a risibí yamada di un kiebro ku a tuma lugá na un bankomátiko riba Sta. Rosaweg na altura di misa katóliko di Sta. Rosa. For di investigashon preliminar a sali na kla ku deskonosínan lo mester a yega na e bankomátiko en kestion i probablemente ku uso di e.o. gas, a rementá e bankomátiko pa asina por a haña akseso na e espasio unda tin sèn. Na momentu ku polis a yega, a topa un kantidat di sèn di papel benta abou, tantu kaminda kliente ta para pa hasi transakshon, komo parti pafó riba kaya. E sènnan aki a keda konfiská, miéntras a inisiá ku e investigashon táktiko i forénsiko. No ta konosí e kantidat di sèn ku malechornan a bai kuné for di e bankomátiko aki. E destrukshon ku a keda hasí ta enorme. Kuerpo Polisial ta hasi un apelashon na kualke siudadano ku por a nota kualke situashon òf personanan sospechoso den e área aki durante e orario ariba menshoná òf tin kualke informashon tokante di e kaso, pa tuma kontakto inmediatamente ku polis na 917, 24 ora pa dia òf yama e liña anónimo 108.

 

LAGA UN KOMENTARIO

Please enter your comment!
Please enter your name here