WILLEMSTAD - Djabièrnè 9 di yüli 2021, alrededor di 04.29’or, Sentral di Polis a risibí notifikashon di un kaso di atrako ku a tuma lugá na un kas na Van Goghstraat.

For di un investigashon ku polis a realisá na e sitio a resultá ku dos hòmber a sorprendé habitante di e kas na momentu ku e la yega kas.

A bai paden ku e habitante, bai den un kamber i bou di menasa ku arma di kandela a pidi un otro habitante yabi di un kaha fuerte. Den un otro kamber di e kas tabatin un habitante drumi abou ku man i pia mará i un di dos sospechoso ku kara tapá i tabata pidi pa mas plaka kèsh. Na lugá di mas sèn kèsh nan a tuma yabi di un ‘raptor’ i bai for di e sitio ku e ‘raptor’, plaka kèsh i prenda.

Kontinuando ku e investigashon polis a topa ku e ‘raptor’ ku a keda hòrtá un ratu promé, riba kaya. A kuminsá ku un persekushon for di Monte Carmelo te ku Peruweg kaminda e shofùr a aksidentá. Durante kontrol ku a hasi riba e sospechoso a top’é ku un arma di kandela den un tas ku e tabatin den su poder.

A konfiská e arma di kandela i detené e hòmber sospechoso G.R.M.M. nasé na Kòrsou di 26 aña di edat.

A presentá e sospechoso dilanti di un fiskal ouksiliar, ku a ordená su enkarselamentu pendiente di mas investigashon.