WILLEMSTAD- Djárason 12 di yüli 2017, alrededor di 08.27 or di mainta, Sentral di Polis a risibí notifikashon di un kaso di ladronisia ku violensia ku a tuma lugá na un òptika riba Fokkerweg. For di un investigashon preliminar ku Polis a realisá na e sitio a resultá ku dos (2) hòmber ku arma di kandela a drenta e establesimentu i bou di menasa a bai ku un kantidat di 50 brel i un telefòn selular for di e sitio. Kontinuando ku e investigashon den e kaso aki, Polis a risibí informashon ku a señalá e antisosialnan den área di St. Jago. Diferente unidat Polisial a dirigí nan mes pa e sitio pa asina yuda ku e búskeda i pa detené e sospechosonan.
E agentenan polisial a señalá un hòmber ku ta kuadra ku deskripshon di un di hòmbernan ku un ratu promé a kometé e ladronisia ku violensia ariba menshoná.
A kuminsá ku un persiguishon na pia bulando den diferente kurá di kas.
Alrededor di 08.50 or Polis a lokalisá tres (3) hòmber sospechoso den e parti abou di un kas den konstrukshon den Sint Jagoberg.
Durante detenshon di un di e hòmbernan Polis a hañ’é ku un arma di kandela outomátiko den su poder. Tambe a haña un tas ku un kantidat di brel ku probablemente ta prosedente di e ladronisia ku violensia ku ratu promé a tuma lugá.
Mas aleu a haña e pañanan ku e sospechosonan tabatin bistí na momentu ku a kometé e ladronisia.
Dilanti di e kas Polis a haña e outo ku probablemente e sospechosonan a usa pa hui for di e establesimentu na Fokkerweg. A konfiská tur e artíkulonan ariba menshoná i tambe e outo pa mas investigashon.
Polis a detené e hòmbernan: J.M.H.H. nasé na Venezuela di 26 aña di edat;
R.A.L.C. nasé na Venezuela di 22 aña di edat;
D.S.M. nasé na Repúblika Dominikana di 34 aña di edat.
A presentá e sospechosonan aki dilanti un Fiskal Ouksiliar ku a ordená nan enkarselamentu pendiente pa mas investigashon. Durante búskeda den Sint Jagoberg Polis a topa ku un plantashon di Mariwana na un kas.
Tambe Polis a haña un kantidat di bala skèrpi den e kas.
A konfiská e matanan di Mariwana i e balanan skèrpi pa mas investigashon.