WILLEMSTAD.- E hóben akusado Gianfranco Curiel di apénas 19 aña a keda kondená na 24 luna di kastigu pa mas di 16 atrako.

Curiel huntu ku 10 sospechoso a presentá dilanti hues aña pasá òktober pa tratamentu di e kasonan.

Curiel i Kevin Calle Ibanez Florez tabata e únikonan yòn den henter e grupo.

Mirando nan edat hues Snitker a pidi pa rapòrtnan sikiátriko i sikológiko di ámbos akusado.

Tur a keda akusá di a kometé total 20 atrako.

Den e kaso anterior Curiel su kaso a keda tratá apart relashoná ku su protekshon.

Debí na vários menasa OM a saké fo’i pais. Su kaso a keda tratá via konferensia di video.

Curiel ta e úniko ku a atmití di a kometé 16 atrako. El a inkriminá vários di e akusadonan di a kometé e  atrakonan huntu kuné.

Nan tabata drenta kas di e personanan den oranan di mardugá kara tapá i tur na pretu bistí ora ku e abitantenan tabata drumí i sorprendé nan den kamber.

Mayoria di e víktimanan aki ta di edat avansá.

Den e kaso anterior, hues Snitker a puntra Curiel dikon e tabata kometé e atrakonan.

El a splika ku den promé e tabata hasié ku par di amigu djis pa e tambe ta aden, pero despues e kos a bira un kustumber ku e no por a stòp mas te dia el a kai será.

Durante tratamentu di e kaso Curiel a lanta bira kara pa e víktimanan i a bisa “ Sòri” na tur esnan ku e por a hasi daño.

Hues a relatá, na polis Curiel a deklará riba tur e akusashonnan i a atmití di tabata envolví den e echonan aki. Hues a bisa ku el a tuma responsabilidat di tur loke nan el a hasi.

Hues a sigui bisa, korte mester a wak ora el a kometé tur e atrakonan e tabatin 18 aña. Esei ta hasi un diferensia grandi entre kastigu hubenil òf di adulto.

E representante di Slachtofferhulp sra. Snijders a bisa ku tabatin hendenan ku mester a bende nan kas pa bai biba afó, debí ku e víktimanan a keda hopi troumátiko i ainda ta bou di tratamentu.

Mas aleu hues a splika ku segun sikólogo e por haña un kastigu di adulto pasó e ta responsabel pa su aktonan, miéntras sikiater ta di akuerdo ku e tin ku haña un kastigu hubenil pa asina e por haña yudansa.

Abogado Dickens a lesa un rapòrt kaminda ta bisa ku e akusado a lanta den un kas ku e tabata  wòrdu protehá di mas i tambe mal kriá.

Nunka e tabata sa kon dil ku problema òf a haña chèns di desaroyá su mes personalidat.

E loke nan el a hasi tabata aktonan pa pertenesé na un grupo kriminal.

Fiskal a bisa ku 8 di tur e kasonan sigur por a wòrdu probá.

Segun fiskal e akusado a bai polis i a koperá ku hustisia dor di menta nòmber di tur esnan ku a kometé e atrakonan kuné.

Esei a pone ku e kaso a kue henter un buèlta nobo i pone ku polis a detené tur esnan responsabel i solushoná e kasonan.

Segun fiskal  e rapòrt sikiátriko a bisa ku por mira ku e akusado tabata mustra mas un mucha ku hende grandi.

Fiskal a sigui e konseho di sikiater i ta demand’é na  2 aña di kastigu ku ta esun máksimo pa kastigu hubenil.

Curiel a bisa ku e úniko kos ku e ke aworakí ta haña un chèns pe kaba su skol.

Hues Snitker a bisa ayera ku e ta sigui e demanda di fiskal i tambe sikiater. Hues a konden’é na 24 luna di prizòn mas guia di Reclassering.