WILLEMSTAD.- Ayera durante oranan di atardi sentral di polis a keda dirigí pa Sombreroweg ku ta keda den Buena Vista despues di a risibí informashon di un kaso di atrako ku lo mester a tuma lugá. Mesora a manda un kantidat di patruya na e sitio.

Na nan yegada a bin topa ku un dama di edat ku a deklará ku un ratu promé e lo mester tabata drumí den su kamber. Dado momentu el a sinti un hende habri su porta di kas pero a kere ku lo tabata su kasá. Pero e momentu ei e dama a keda sorprendé pa un atrakadó ku mesora a kuminsá eksigí plaka.

Finalmente e atrakadó lo mester a logra bai ku un pòtmòni ku kontenido i tambe un tablet marka Samsung koló blanku. Despues e atrakadó a bai na porta di un apartamentu den e kurá pero no a logra habri esaki. Finalmente el a hui na pia i bai for di e sitio.

Polisnan ku a presentá na e sitio a kore buska den e área pero no a logra topa ku e atrakadó. Atrako tim a presentá i tambe personal di “Slachtoffershulp” a keda pidí pa asina presentá i  duna e dama yudansa.