WILLEMSTAD.- Den fin di siman tras di lomba a tuma lugá un aktividat pa rekoudá fondo pa sigui mehorá nos Zoologiko nashonal, esaki tabata un éksito, pero parke tropikal/Zoo Curaçao a konfrontá algun akto di vandalismo.

Durante di e aktividat aki, muchanan tabata tira piedra riba porkonan i ta tribi di bisa si e bestianan ta drumi so, p’esei a tira nan ku piedra pa nan lanta. Otro a opta pa hunga baseball ku piedra den ‘petting zoo’, otro a dal un yu di konènchi ku piedra i mata esaki.

Tambe tabatin robo di webu di galiña for di den ‘coop’.

Otro antisosial no opstante bòrchinan grandi di regla na porta, a opta pa bai sinta huma sigaria i duna un makaku sigaria. Bert Isenia direktor di Curaçao Zoo ta konsiderá esaki komo hende bestia i bobo!

Asta e palu di Kayuda ku Minister Suzy Camelia Römer a planta algun siman pasa a risibí sla dor ku mayornan ta laga mucha trèk na esaki òf kibra taki pa hunga spada, ki tipo di hende nos sosiedat a produsí e último 30 añanan, akaso esaki ta e futuro ku Kòrsou lo tin?

Bert Isenia ta bisa ku mayornan ta laga hopi di deseá i ora konfrontá nan ku e akto di nan yunan ta menasa personal i boluntarionan ta risibí di e grupo marginá i sin edukashon aki.

Ladronisia i vandalismo.

Djaluna mardugá vigilansia di CVD ku ta tin e parti di seguridat di Zoo na nan enkargo a konfrontá un kiebro kaminda a bai ku un ‘wakamaya blue and gold’, e animal aki ta riba CITES 2 i ta bestia ku tin registrashon.

“Nos ta hasi un yamada na komunidat si bo sinti ku bo bisiña tin un wakamaya ku promé bo no a tende pa bèl 917 òf 736-0188 pa duna melding”, Bert Isenia a bisa.

E tipo di aktonan aki tin ku stòp i mester sanshoná nan severamente.

Nos sosiedat a degenerá asina tantu ku  ni nos parke di bestia nashonal no ta safe mas?

Tristu pa tin ku yega trabou i realisá ku e trabou duru ku ta hasiendo ta wòrdu daña pa hende marginá i sin eskrupulo!

“Nos ta bolbe hasi un yamada  urgente  na VVRP i GMN pa yuda enkaminá e prosesonan mas lihé posibel pa por será e kura di Dierentuin na blòki i ‘security fence’ i koriente pa evitá vandalismo di e manera aki i tambe garantisá kontinuashon di nos parke nashonal di bestia”, e direktor di Curaçao Zoo a bisa.

Tambe ta di sumo importansia pa mantené e gremio marginá afó! Dikon otro parkenan si ta funshoná na Kòrsou?

Debí ku nan ta kobra, esaki lo ta un di e solushonnan pa Curaçao Zoo, kobra na entrada lo eliminá e hende sin eskrupulo di drenta i hasi daño!

Un Yamada na Minister Camelia Römer pa analisá e situashon aki i nos ta bolbe pidi pa konsiderá e petishon aki.

No por spera un oumento finansiero pa operashon optimal di nos Zoológiko di parti di gobièrnu sigur pa 2018, pues duna e espasio pa kobra algu pa asina yuda nos mes lanta para poko poko.

No opstante un pòst grandi ta bai pa vigilansia tòg esaki no ta sufisiente debí ku e área ta hopi grandi i pèrmitnan pa por será kura na un altura nesesario pa seguridat ta tarda pa por risibí aprobashon.

....riba e fotonan entre otro e destrukshon i e