WILLEMSTAD.- Den un karta fecha 29 di ougùstùs 2018, dirigí na minister di finansa Kenneth Gijsbertha e Kolegio di Supervishon Finansiero (CFT) ta ekspresá preokupashon serio pa e situashon finansiero di Kòrsou. Den e karta e kolegio ta splika ku a base di e adaptashon di e presupuesto ku a keda aprobá i tambe e di dos reportahe di ehekushon nan ta yega na e konklushon ku Kòrsou lo no por kumpli ku e normanan di presupuesto konforme artíkulo 15 di e lei di Reino ku ta trata supervishon finansiero.

CFT ta sumamente preokupá pa e situashon finansiero ekonómiko di Kòrsou i ta hala atenshon di gobièrnu pa tuma e pasonan nesesario pa garantisá ku ta yega na solushonnan struktural. Mirando e seriedat di e situashon CFT ta indiká ku lo informá Konseho di Minister di Reino inmediatamente di e desaroyo aki, konforme artíkulo 4 di e lei di konsenso ku ta trata Supervishon Finansiero. Keda pendiente pa mas detaye riba e desaroyonan aki den EXTRA su próksimo edishon.