WILLEMSTAD.- Apesar ku Nashonnan Uní a stipulá e fecha di 20 sèptèmber komo Dia Mundial di Limpiesa, Curaçao Clean UP lo mantené e di 3 djasabra di sèptèmber komo e dia di limpiesa, manera el a bin ta hasi for di dia ku el a lanta. E aña akç atrobe lo tene 2 dia di limpiesa. Asina Sharo Bikker di Curaçao Clean UP a duna di konosé den e ‘podcast’ 3or ku Gino riba plataforma digital di EXTRA.

Na 2024, 20 di sèptèmber a kai riba un djabièrnè i Curaçao Clean Up a disidí di tene 2 dia di akshon di limpiesa. E akohida tabata bon i e aña akí a disidí ku ta bolbe hasi e akshon di limpiesa durante di 2 dia, apesar ku 20 di sèptèmber ta kai riba un djasabra. “Djabièrnè ta pa kompanianan, skolnan i otro organisashonnan ku ta preferá di tene nan akshon di limpiesa riba e dia akí”, Bikker ta deklará

For di djabièrnè lo tin bakinan grandi den barionan pa tira sushi den dje i lo tin hendenan kla pa yuda pa rekohé e shushinan akí. Bikker ta bisa ku 2 dia di limpiesa ta rekerí mas organisashon. Ya kaba ta manda mensahenan pa reservá e fechanan aki pa e akshonnan di limpiesa.

Tambe a kuminsá duna informashon tiki tiki tokante di e dia di limpiesa. “For di ora kuminsá papia di Dia Mundial di Limpiesa hendenan ta bira mas aktivo.” Curaçao Clean Up ta duna sosten na tur organisashon ku ke organisá un akshon di limpiesa. Tambe ta duna kooperashon ku material manera harka i sakunan di shushi.

Loke ta mas importante ta e konsientisashon ku ta krea ku mester tene Kòrsou limpi, Bikker ta bisa mas aleu. Ta den e kuadro aki tambe Curaçao Clean Up ta spera ku pa próksimo aña eskolar e por lansa su material digital pa skolnan avansá. Esaki ta yuda krea konsientisashon riba kon atendé di forma responsabel ku shushi i pa hasi mas na resiklahe.

“No ta difísil. Na kas mes por tuma nota kuantu plèstik ta usa. Por pone esakinan den un saku apart i bai tira nan afó den e kònteinernan grandi di Curaçao Clean Up pa rekohé plèstik, bòter i bleki.”

Tambe Bikker ta bisa ku ta konsiente ku mester pone mas di e kònteinernan aki. A primintí área di Bándabou ku ta pone un kònteiner pa nan tambe. “Alabes ta mira ku hotèl i sierto lugánan turístiko ta hasi na resiklahe. Aeropuerto tambe, pero e no ta sufisiente.”

Pa e motibu akí Curaçao Clean Up ta sigui hasi esfuerso pa krea konsientisashon i pone mas kònteiner. Tambe ta rekonosé e ayudo ku ta haña serka Selikor durante tur e akshonnan di limpiesa ku ta organisá. Bikker ta bisa finalmente ku Selikor mes tambe tin e proyekto “Kòrrrsou” ku tambe ta yuda pa hasi komunidat mas familiar ku resiklahe.

Foto:

...Sharo Bikker...