Artistanan a hasi donashon di nan obranan

WILLEMSTAD.- Autism Aid Foundation su promé evento ayera nochi a resultá super eksitoso. Artistanan grandi pero tambe artista outista a pone nan obranan na disposishon di e fundashon pa asina dal e promé paso pa e fundashon por lanta.

Mas di 13 mil florin a keda rekoudá den e subasta ku a tuma lugá den landhuis Klein Kwartier. Un di e artistanan prometedor, hóben outista Errin Dorand a traha 4 piesa ku a keda kumprá rápidamente. Errin ta kolega stazjèr na EXTRA ku próksimamente lo kuminsá skol di arte na IBB.  Su obranan ta figuranan trahá kompletamente di teip. Pero tambe tabatin artistanan grandi manera Yubi Kirindongo, Francis Sling, Herman van Bergen, Giovanni Abath, rumannan Goilo, Mercedes de la Cruz, Carel Rink, Andfre Nagtegaal, Garrick Marchen a forma parti di e anochi aki.

Jean Paul i Linsey Fernandes, mayornan ku tambe yu outista i inisiadónan di e fundashon por mira bèk riba un evento eksitoso. Meta di e fundashon ta pa lanta un sentro di terapia pa muchanan outista pero tambe trese e konsientisashon den komunidat di outismo.

Intenshon tabata pa a organisá un subasta anualmente pero mirando e éksito tras di esaki lo bin ku un mas pronto. Pues keda pendiente na tur ku ke duna un man na trese e konsientisashon den komunidat di kiko ta outismo.

...Riba e fotonan e entusiasmo ku tabatin ayera nochi pa e subasta di Autisms Aid Foundation....