WILLEMSTAD.- Ayera nochi algu promé ku 10 or, toren di kontròl di aeropuerto a bati alarma na momentu ku nan a risibí informashon ku un avion di karga di e kompania DHL ta preparando pa hasi un aterisahe di emergensia.

Segun bosero di CAP Fayna Haseth, pilot di e avion a mèldu esnan konserní na momentu ku el a deskubrí ku nan ta konfrontando sierto problemanan tékniko, i ku ta nesesario pa hasi un aterisahe di emergensia. A pone brantwer di Hato i tambe personal di Brantwer Kòrsou na altura i a pone nan "standby". E avion a logra hasi un aterisahe di emergensia eksitoso apesar ku esaki tabata poko turbulento.  Tantu e pilot komo tripulante a logra baha for di e avion sano i salvo.

Pa por realisá e investigashonnan nesesario a sera aeropuerto pa tur avion ku mester drenta òf sali, ounke ku ya pa e dia no tabatin ningun avion programá pa lanta òf baha mas. E avion a keda para riba pista pa algun ora te na momentu ku a haña e forma pa bai kantu kuné pa asina por kontinuá ku e investigashon.