WILLEMSTAD.- KLM ta konfrontando problema ku un di su avionnan i esei ta motibu ku pasaheronan ku awe lo mester a subi KLM buelo KL736 pa 17:15 rumbo Amsterdam lo mester warda te e siguiente dia pa nan biaha.

Pa kolmo e avion ku mester a sali Ulanda 15:30 pa bini Korsou pa buska e pasaheronan ta pegá ainda na Schiphol debí na problemanan tékniko. KLM no kier a definí ta kiko ta índole di e problemanan tékniko ku nan ta konfrontando.

E avion ku ta daña na Korsou ta ‘City of Nairobi’. Ta trata di un avion ku tin 26 aña pues for di 1993 e ta den operashon. Na 2018 e avion aki tabata den notisia despues ku el a konfrontá problemanan ku motor i a keda pegá na Nairobi. E pasaheronan mester a keda warda un otro avion pa kuater dia. KLM no ta spera ku e problema ku City of Nairobi lo dura asina largu. Bosero di KLM sra. Pietersz ta kalkulá ku lo por solushoná e problema den 24 ora. Ta bon pa apuntá ku KLM a mantené mesun tempu pa e pasaheronan ku a keda pegá na Korsou, pues e orario di sali di e avion mayan lo ta mesun kos ku esun ku mester a bai awe. Naturalmente tur esnan ku ta wardando un persona riba buelo di KLM lo mester warda un dia mas.