WILLEMSTAD.-Kòrsou ta hañando hopi awa e dianan aki. Na Bándabou por a mira gran kantidat di awa ta basha den área di seru Kristof i otro partinan. Defisiensia di vários edifisio nobo i esnan mas bieu ta sali dilanti e dianan aki. Tantu den Otrobanda, Punda, Pietermaai i Skalo unda tin kasnan bunita di ántes, ku awendia a bira monumento, por mira ku e kantidat di áwaseru tin su efektonan. Un di e áreanan bastante afektá ta Otrobanda.

Den Pietermaai EXTRA a tuma nota ku e edifisio di Ofisina di Turismo tambe a haña un poko daño debí na áwaseru. E edifisio di CTB ta parsialmente monumento, den sentido ku parti dilanti ta monumento. Ya kaba CTB a buska un eksperto riba e tereno pa wak e situashon i duna konseho kon ta e mihó manera pa atendé ku e kaso. CTB a tene bon kuenta ku e aspekto di seguridat i a pone atvertensia pa tur hende ku yega na e edifisio pa tene kuenta.

Den kombersashon ku Marcel Dennert di Monumentenzorg el a splika ku nan organisashon ta doño di edifisionan ku nan ta hür na tersera. Ku e entrada nan ta mantené edifisio i si por ta atendé restourashon di otro edifisionan. Tur loke ta trata inspekshon di edifisionan i tambe aserka doñonan pa mantené monumentonan ta tarea di gobièrnu.

Komo un di e ekspertonan lokal riba tereno di monumento sr. Dennert ta konsehá tur propietario di un monumento pa sòru ku ‘goot’ di dak ta bon será.

Nos hendenan mas hóben lo puntra kon un ‘goot’ por ta será? Dennert ta splika ku e kasnan di ántes, loke nos ta yama monumento awendia, tin un ‘goot’ ku ta pasa riba òf den e muraya. Pues e awa ta baha di e dak i bai den e ‘goot’ i ta kore den e muraya bai basha den renbak òf afó. E sistema di ‘goot’ moderno ta di plèstik òf aluminio i ta plak e pidanan na otro pa awa kore segun un ruta destiná. Si laga ‘goot’ di dak keda habrí, áwaseru lo pasa i drenta murayanan. Una bes esei sosodé, anto ku e kantidat di awa ku ta kai e dianan aki, esei lo kousa demasiado daño. Por ehèmpel e awa lo por sipel bai den muraya i mata ta krese i sker e muraya. No lubidá ku e murayanan di edifisionan di ántes tabata di piedra di koral i no tabata usa semènt i blòki. Awa drenta e murayanan ei e ta kousa un desaster. Meskos tambe pèrkurá pa e dak ta bon, i sòru pa porta i bentananan ta bon será. Mester hasi tur esfuerso pa awa no drenta pasobra esei lo kousa un daño enorme na e edifisionan.