WILLEMSTAD,- ‘Algu notabel ku nos a mira e dianan aki na Kòrsou ta altura di awa.’ Asina meteorologo Yogi Coffie di Meteo Kòrsou a splika ayera. Coffie a pone atenshon na un fenómeno di laman ku ta visibel na Kòrsou, Boneiru i Aruba tambe. ‘Riba Waaigat por a mira ku den parti di e dia awa tabata hopi mas abou ku normal. Tambe na laman por a mira e awa ku ta mas abou ku normal. Esaki ta hopi visibel na entre otro parti sur di nos isla i tambe na Caracasbaai.’ Coffie a splika ku awa ta subi i baha dor di e sistema di mareas, ku nos ta konosé komo ‘eb en vloed’.
‘Pero den e kaso aki e loke adishonalmente a bin aserka ta ku e preshon di airu ta mas fuerte ku normal. E último dianan e preshon a yuda pone e awa mas abou ku normal.’
Kòrsou ta midi e nivel di awa na Bullenbaai i for di dia 23 di febrüari por a mira ku e diferensia entre ‘eb en vloed’ a bira mas grandi ku normal. ‘dia 23 di febrüari e preshon haltu a kuminsá ta oumentá. For di e dia ei e altura di laman a bai baha te un désimo. Awa a subi te mas o ménos 6 ‘or di mainta i el a baha mas o ménos 6 ‘or di atardi.’
EXTRA den e último dianan a haña hopi reakshon di hende ku ta preokupá tokante e awa ku ta baha asina drástiko. Na promé instansia diferente eksperto no por a duna un splikashon tokante e fenómeno straño. A bisa ku pronóstiko di ‘eb en vloed’ na Schottegat no a indiká ningun bahada di nivel di laman ku mas ku 6 cm.
Coffi ayera a splika ku e situashon no ta di preokupashon. Ora e preshon di airu a bira mas normal, nivel di awa lo baha normal atrobe.