WILLEMSTAD. – Ayera e barku di fruta venezolano Carmen D a drenta, pero despues di tabatin problema ku motor, e barku a drif dal den baranka i haña un buraku.

Esaki a pone ku awa a kuminsá drenta e barku i mester a kuminsá ku trabou di pòmp saka e awa. A mara e barku parti paden di Smithbrug. Kondishon di e barku no ta bon i ayera anochi te lat MAC i HVI tabata hasiendo inspekshon riba e barku.

E kondishon ku e barkito ta aden, ta kompliká i no por lag’é krusa i bin e otro banda kaminda e otro barkito nan ta pa bende fruta i berdura. E barku ta keda kaminda e ta awor aki.

Opshon ta ku ta drecha e kondishon, pa wak si e barku por krusa laman pa Venezuela. Pero tripulantenan a nenga kategórikamente ku nan lo krusa laman den e barku aki ku no ta den bon kondishon.

Te ku ayera anochi despues di basta trabou riba e barku, ainda e awa ta sipel drenta. Awe mainta lo sigui buska solushon i disidí kiko ta bai hasi ku e barku.