WILLEMSTAD.- Djaluna dia 15 di mei 2017 a sali un publikashon, huntu ku algun portrèt, den EXTRA kaminda a wòrdu menshoná ku tabatin un ka’i morto habrí den e santana Protestant na Roodeweg, Otrabanda. Lesando e artíkulo e lesadónan por konkluí ku esun responsabel pa e maneho i e mantenshon di e santana a faya dor ku nan a laga e ka’i morto habrí i asina kousando doló pa e famia di e defuntu i por ta pa otro hende tambe. Relashoná ku e artíkulo ariba menshoná e Kongregashon Protestant Uni di Kòrsou (Verenigde Protestantse Gemeente,  abreviá VPG) kier informá komunidat di Kòrsou lo siguiente. Djasabra último, 13 di mei,  famia di un defuntu ku ta derá den un kèlder den e santana Protestant na Roodeweg a akudí na e santana pa, konforme e reglanan ku ta rigi deramentu den e santana aki, saka e restunan di nan ser kerí for di un kèlder i buta esakinan den un kaha mas chikitu pa despues hinka e restunan den e kèlder di moda ku mas defuntu di e famia por haña un lugá di sosiegu den e mesun kèlder.

Despues ku a kaba saka e restunan di e difuntu for di e ka’i morto grandi i buta esaki den un kaha mas chikitu pa despues hinka esaki den e kèlder, áwaseru a kuminsá kai basta duru.

Mirando e kantidat di awa ku tabata kai, e trahadónan di e santana a para e trabou di deshasí di e ka'i morto grandi. Pa un motibu òf otro e trahadónan no deshasí di e ka’i morto grandi riba e mesun djasabra, lokual e asosashon ta lamentá profundamente. Pues ora e persona a saka e potrètnan en bèrdat e ka’i morto tabata abou abrí den e santana, pero sin restunan mortal den dje. VPG ta lamentá e suseso aki i lo pèrkurá ku e lo no ripití. Nan ta pidi nan diskulpa si e suseso aki por a kousa kualkier doló na famia ku tin nan sernan kerí dera den e santana aki.

VPG pa medio di e komunikado aki kier sigurá tur su miembronan en partikular i tur famia en general ku tin sernan kerí derá na tantu su santana den Roodeweg komo den esun na Oranjestraat ku VPG lo sigui hasi máksimo esfuerso pa garantisá ku e último lugá di sosiegu di nan ser kerí nan lo wòrdu kuida mas dignamente posibel, pa asina demostrá rèspèt na tantu e defuntunan komo tambe na nan famia.