Kantidat di kasonan a subi meskos ku kantidat di klùsternan

WILLEMSTAD.- Premier Eugene Rhuggenaath den un diskurso a splika komunidat di Kòrsou ku entrante awe nos a drenta fase #3 di eskalashon di medidanan den kuadro di Covid-19. Dr. Izzy Gerstenbluth a splika tambe ku a haña resultado di 75 tèst ku a hasi.  Di e kantidat aki 4 kaso a resultado positivo di kua 2 kaso ta relatá na kasonan anterior i e otro dosnan ta den investigashon ainda. Tin un kaso ku mester a bolbe keda atmití den hospital. E total for di mart ta 161 kaso total ku un kantidat di 102 kaso aktivo i 58 hende a rekuperá.

Premier Rhugenaath a sigui splika ku manera por a antisipá mester a yega  na e modelo di eskalashon di medidanan ku e meta pa prevení mas plamamentu di e vírus. Ta den fin di siman pasa a tuma e desishon pa eskala atrobe. Premier ta keda enfatisá ku tur hende mester keda kòrda ku e propósito di tur e medidanan aki ta pa dominá e menasa ku Covid-19 ta representá i komo tal ta tuma medida pa protehá komunidat pa e plamamentu di e vírus.

Ta tuma e medidanan di forma balansá pa motibu ku mester wak di un banda e impakto riba kuido médiko i e kapasidat médiko, pero di otro banda mester wak e aspekto di bida sosial i ekonomia pa tòg n un manera balansá eskalá medidanan pero teniendo kuenta ku bida mester sigui.

E mihó manera pa evitá e plamamentu di e vírus ta di tene distansia sosial i mantené medidanan di higiena tur momentu. Sinembargo sektor di salubridat a mira ku e kantidat di kasonan a subi i meskos ku e kantidat di klùsternan. Tambe ta asina ku e kantidat di kasonan positivo ku no por detektá nan fuente tambe a sigui krese. Análisis ta laga nan yega na e konklushon ku mester eskala bai fase 3.

E motibu di esaki ta pa prevení. Mester tuma medida ku ta bai dura pa e próksimo 3 simannan, tur esaki pa prevení ku e kasonan positivo ta sigui eskalá i kisas asta hendenan mas vulnerabel ku esaki ta akumulá i pone mas preshon riba kapasidat médiko i órden públiko. Ta tuma medida pa evitá lo peor.

Medidanan

Entrante mayan 15 september no por tin mas ku 4 hende huntu den lugá públiko. Establesimentunan por keda habrí te 10’or anochi i ku un máksimo di te 50 persona den kada establesimentu. Pa ‘mantelzorg’ tambe ta bin reglanan. Trùk di pan por habri for di 5’or atardi te 10’or anochi. Eventonan deportivo por sigui pero sin públiko. Entrante djaweps awor ta bolbe introdusié “toque de queda” for di 11’or anochi te 5’or mainta.