Kuido Intensivo di 33 pa 41 persona

WILLEMSTAD.- E situashon di Covid ta sigui unu di preokupashon maksimo. Tur hende ta fada, pero e situashon ta sigui empeorá i pesei medidanan mester keda na vigor. Dr. Jerry Semper na e okashoná aki a duna di konosé ku pa awe tin 66 hende interná den e departamento general di Covid na Curaçao Medical Center (CMC). Si djamars último tabatin 33 pashènt den kuido intensivo, pa awe djasabra e kantidat a yega 41. Esei ta demasiado asina e médiko a enfatisá. E situashon ta asina serio te ku mester a manda 5 pashènt di Kòrsou pa Aruba. E médiko a yama danki na Aruba pa habri porta pa risibi e pashèntnan.

Semper ta hopi satisfecho ku e operashon na Sambil pa yuda den e proseso di ampliashon di bakunashon. Den e promé dos oranan a bakuna 450 hende na Sambil. Ta spera ku lo por yega alrededor di 2000 hende bakuna na Sambil pa dia. Tanten ta sigui buska mas lokalidat. E promé dia na Sambil tabatin hendenan pará den rei den solo, e médiko a pidi diskulpa pa esei indikando na mes momentu ku hendenan ta yega demasiado tempran i tambe e entusiasmo a krese hopi den poblashon ku ta pone ku hendenan ta bai Sambil. Mas detaye den edishon di EXTRA.