WILLEMSTAD – Carmabi a kaba di informá ku mester a sera Parke Mangrove awe te próksimo aviso. Durante un kontrol awe mainta a bin konstatá ku atrobe tin awa di riol den e parke. Den anochi di 4 pa 5 di òktober un kantidat di awa di riol a desbordá drenta na e parti ost di e Parke. Komo ku esaki ta okashoná un holó hopi stinki i pa seguridat di bishitantenan i staf di Parke, Carmabi a tuma e desishon pa sera esaki. E situashon ta keda evaluá dia pa dia. Asina ku e awa di riol no tei mas lo bolbe habri e parke. Den pasado a bati bèl kaba ku e problemanan ku riol ta birando hopi frekuente. Carmabi a pidi gobièrnu pa bin ku un solushon. E tema a yega te den Parlamento i na e okashon ei, Minister Charles Cooper a splika tokante e problema di holó desagradabel na Parke di Mangrove. El a hasi esaki den e asina yama “vragenuur”. Minister a informá ku e proyekto aki ta e “Gemalen SVB i Persleiding” ku ta un proyekto pa aktualisá e sistema di riolering den área di Pater Euwensweg i Rif, p’esaki bai te na Klein Hofje. El a splika ku durante luna di yüli tabatin desbordamentu di awa di kloaka, ku a tuma lugá den Parke di Mangrove debí na desperfekto den e “gemaal” nobo.

A splika tambe ku tin un kombenio ku e hotèl den serkania ku ta e Court Yard by Marriott pa pone via di nan generator sufisiente kapasidat pa uso dor di e “gemaal” di SVB pa ora koriente bai. Komienso di sèptèmber e generator lo mester a kuminsá funshoná i asina ta evitá ku ora koriente kai afó, e pòmp no ta funshoná. No ta konosí si esaki ya ta den uso awor aki den òktober.