WILLEMSTAD.- Manera ta e kustumber tur aña, awe dia 27 e benta di vürwèrk ta inisiá ofisialmente.

Tur aña promé ku e dia di benta yega funshonarionan di e Tim Multidisiplinario formá pa MEO, BAB, Polis, Brantwer i obra públiko ta sali kaya i pasa tira un bista riba tur e puntonan di benta di vürwèrk.

Esaki pa asina wak si primeramente e establesimentu a risibí su pèrmit i ku si nan a kuminsá stòk vürwèrknan kumpliendo ku tur e eksigensianan den e pèrmit.

Un di e aspektonan prinsipal ta esun di seguridat.

Por ehèmpel e sitio pa bende vürwèrk mester ta mínimo 15 meter leu for di kaya, nan mester tin aparato pa paga kandela.

Otro eksigensianan ku tambe nan mester kumpli kuné ta bòrchi ku ta indiká prohibishon pa huma, bòrchi di plèstik dilanti e vürwèrknan, mester tin indikashon di preis visibel, kaha di BAB etc.

Ta p’esei e funshonarionan ta kontrolá estrikto pa asina tur kos kana korekto.

A kuminsá kontrolá promé ku e benta inisiá pero lo kontrolá awe ku e benta a inisiá i lo sigui hasi esaki durante tur e dianan i asina wak ku tur kos ta kana segun regla.

Esnan ku ya a kuminsá stòk a risibí diferente tep pa ku nan establesimentu i lógikamente nan tin e chèns di drecha loke ta nesesario promé ku nan bolbe risibí bishita di kontròl.

E aña aki 18 establesimentu so a hasi petishon i risibí nan pèrmit pa asina por bende vürwèrk.

Kompará ku otro añanan e kantidat ta relativamente abou.

Hopi di e eks bendedónan di ántes ta bisa ku e benta no ta kana bon mas i ku nan ta hiba pèrdida.

E echo ku interes di kumpradónan a bira hopi ménos, tin efekto serka e bendedónan.