WILLEMSTAD.- Awe e di tres kargamentu di vakuna ta yega Kòrsou. Ta trata aki di 18.720 vakuna ku ta yega for di Hulanda pa asina por duna mas hende e oportunidat di pasa e vakuna. Te ainda ta pasando vakuna na hendenan ku ta traha den kuido, 60+ i personanan ku un malesa króniko.

Luna pasá den e di dos siman di Febrüari e promé vakuna a yega Kòrsou miéntras ku den e di dos siman di e luna aki e di dos vakuna a yega Kòrsou. Na tur dos okashon a yega e mesun kantidat di vakuna kual ta 18.720

Awor ku ta bolbe haña mas vakuna awe, ta spera ku pronto por habri e posibilidat pa otro personanan ku no ta 60+ òf personanan ku tin un malesa króniko tambe haña e oportunidat pa por pasa nan vakuna.

Ta hopi ta e personanan den nos komunidat ku ta interesá pa tuma e vakuna, pero ku ainda no ta bini na remarke. Manera ya ta konosí, tur persona ku pasa e vakuna aki ta pas’é dos biaha mirando ku e vakuna mes ta konsistí di dos dósis. Pues na momentu ku un persona pasa su promé vakuna, mesora e ta haña un sita pa asina e por pasa e di dos vakuna despues di tres siman.