Djadumingu 4 i djaluna 5 di yüli sentro di bakunashon SEHOS-POLI ta será

WILLEMSTAD. - Konforme informe di tim di vakunashon, t’asina ku awe djasabra ta vakuná solamente studiantenan ku ta bai studia afó ku e vakuna di Pfizer.

Esaki ta pone ku tur persona ku tin un sita pa vakuná riba dianan 3, 4 i 5 di yüli, lo risibí un fecha nobo pa vakuná entrante 6 di yüli próksimo. Si no risibí fecha nobo via e-mail, por yama 9345.

Djadumingu 4 i djaluna 5 di yüli sentro di vakunashon SEHOS-POLI ta será pa públiko.

Manera menshoná na algun okashon, t’asina ku Kòrsou ta riba un bon kaminda pa loke ta trata e programa di vakunashon. Kòrsou por papia di un éksito, ounke ku lo ta mihó Kòrsou logra 105.000 hende vakuná.

Te ku ayera tabatin 88.840 persona ku a risibí nan promé vakuna i 78.833 persona ku a risibí nan di dos vakuna. Esaki ta pone ku total vakuna apliká a yega na 167.673.

Te ku ayera Kòrsou tin 89.983 persona registrá pa pasa nan promé vakuna i esaki ta nifiká ku tin 1.143 persona pendiente pa pasa na promé vakuna. Pues tur dia un tiki, Kòrsou tin hopi chèns di yega hopi pega ku inmunidat kolektivo.