WILLEMSTAD.- Awe ekiponan grandi lo yuda bòltu tera na e kandela ku a surgi na Ser’i Kandela p’asina yuda brantwer Kòrsou pa kaba di paga e kandela grandi di mondi/sushi ku a surgi djaluna mainta.

E kandela grandi di mondi na Ser’i Kandela djaluna na altura di Kaya Sucre ta kousando hopi molèster di huma pa e área di Ser’i Kandela i besindario. Brantwer Kòrsou a risibí notifikashon alrededor di 10:48 mainta di un kandela di mondi basta grandi na Ser’i Kandela.

Brantwer Kòrsou a dirigí vários unidat na e sitio di e kandela pa kuminsá kombatí e kandela di mondi. Na e sitio Brantwer Kòrsou a konstatá ku ta trata di kandela grandi di mondi i mirando e embergadura di e kandela mester a hasi uso di tres “loader” tambe pa kombatí e kandela.

A limpia riba e tereno parti nort di e kandela, kaminda tin mondi pa evitá ku e kandela ta sigui ekspandé.

Na e momentunan aki Brantwer Kòrsou ta hasiendo su máksimo esfuerso pa kaba kombatí e kandela mirando ku ainda e ta un “kandela di fòrnu”.

Brantwer a hasi apelashon na abitantenan i negoshinan den e área di Ser’i Kandela, Souax, Gato, Papaya i besindario pa tene bentana i porta di kas i/òf edifisionan será. Personanan ku ta eksperensiá molèster i/òf personanan ku ta sufri di un malesa respiratorio ta ser konsehá pa bandoná e área i keda na un otro sitio. Abitantenan di barionan den serkania mester tene kuenta ku molèster di holó di huma por permanesé algun dia. Pues ta di spera ku awe brantwer por kaba di paga e kandela aki tambe.