WILLEMSTAD.- Ministernan Javier Silvania i Ornelio Martina di respektivamente Finansa i BPD ta spera di por manda nan kontestanan pa gobernadó awe. Gobernadó despues di a risibí un proposishon pa paga 1.750 florin na gratifikashon a manda hasi vários pregunta.

A formulá e kontestanan i tambe ta manda huntu ku e kontestanan un konseho finansiero i un konseho hurídiko. Speransa ta ku e konseho hurídiko ta drenta awe pa asina via sekretariado di Konseho di Minister manda esakinan pa gobernadó.

E proposishon ta keda ku ta paga un gratifikashon di 1.750 florin pa tur ámtenar i dosente. E konseho finansiero riba e proposishon aki ta positivo. Ta kuestion pa minister Silvania kambia e parágrafo finansiero den presupuesto supletorio ku mester bai parlamento i kambia e denominashon di un pago di plaka di fakansi di 3 porshento pa un pago di gratifikashon di 1.750 florin pa persona.

E gastu total pa e gratifikashon ta 10,6 mion loke ta igual na e 10,6 ku Silvania a reservá pa pago di 3 porshento na plaka di fakansi. Trahadónan di instansianan supsidiá pa gobièrnu no ta kai den e pago aki, mirando ku gerensia di e instansianan aki tin nan propio outoridat pa paga e trahadónan i tin nan propio palabrashon konforme kontratonan kolektivo ku a negoshá ku representantenan di trahadó.

Pa e parti hurídiko di e pago di gratifikashon redakshon di EXTRA por a komprondé ku esaki no mester ta un problema si tuma na kuenta ku den pasado a yega di paga un tipo di gratifikashon general òf “bashí premie” na empleadonan públiko.