WILLEMSTAD.- Awe Korte di Apelashon ta kuminsá ku tratamentu di e kaso Maximus kontra di eks minister di finansa George “Jorge” Jamaloodin. E tratamentu ta kuminsá awe djaluna 18 di yanüari i ta dura te ku djabièrnè 29 yanüari. Tratamentu dje kaso aki ta tuma lugá den Kazèrne Marina na Suffisant.

E motibu ku a bai otro lokalidat, ta debí na kapasidat di sala, ya ku tin otro kasonan tambe andando na Kas di Korte.

Ademas dor di medidanan di COVID, kas di Korte tin ménos espasio pa tuma hopi públiko. Ademas e kaso ta trese kuné medidanan èkstra di seguridat.

Debí na esei tambe no tin espasio pa mas públiko por sigui e kaso. Solamente esnan ku a mèldu a reserva espasio pa nan den sala.

Jamaloodin a apelá e sentensia di 28 aña di prisòn ku el a haña den luna di ougùstùs di 2019.

Korte a haña proba “uitlokken” (provokashon) pa asesiná Helmin Wiels dia 5 mei 2013.

E di dos kaso ta “Passaat”, kaminda ku ta akus’é di lo a kometé falsifikashon di dokumentu i kometé froude ku e loke ku nan ta yama “inkeerregeling”. Korte no ta haña esaki probá i a apsolvé e akusashon aki.

Pa loke ta trata e kaso Germanium, korte ta haña esaki probá ku el a malversá plaka ku tabata destiná pa un Sentro di bario na un montante di 450 mil florin, ku tabata plaka ku gobièrnu a duna komo supsidio, pero ku nunka a bai pa a proyekto. E plaka nan a disparsé pa metanan privá serka Jamaloodin.