Despues ku ayera Aruba i Boneiru a risibí vakuna:

WILLEMSTAD. - Den un komentario kòrtiku formulá pa redakshon di EXTRA, Minister Zita Jeus-Leito a konfirmá ku awe vakuna kontra di COVID-19 ta yega Kòrsou. No tin informashon kuantu vakuna Kòrsou lo risibí awe den e promé fase, pero segun Minister Jesus-Leito, sufisiente pa e promé fase.

Segun informashon t’asina ku Kòrsou ta risibí e vakuna di Pfizer i esei mester keda den un temperatura semper na -80˚C. Esaki ta trese kuné ku mester transportá e vakuna bou di sirkunstansianan partikular. Pa mantené e 80 ˚C bou di sero, mester paketá e vakuna den un ekipahe spesial i tene den e asina yamá ‘eis seku’.

Esakinan ta keda transportá pa SEHOS ku ta e sentro di vakunashon aki na Kòrsou i kaminda ku a pone tur e frizernan spesial ku ta garantisá ku e vakuna ta keda den un temperatura bou di 80 ˚C.

Ayera EXTRA a informá ku vakuna konttra di COVID-19 lo yega Korsou den fin di siman, pero ayera EXTRA a haña konfromashon di Minister ku awe vakuna lo yega.

Lo kuminsá ofresé tur adulto den e parti Karibense di Reino e posibilidat pa vakuná i meta di e programa di vakunashon ta pa finalisá e kampaña di vakunashon na tur e islanan promé ku e temporada di orkan.

Ayera Aruba a risibí nan prome lote di vakuna kontra Covid19 igual ku Boneiru.

Ministernan i funshonarionan di den kuido aki banda di e kargamentu ku a kaba di yega for di Ulanda. Esaki ta un speransa grandi pa Aruba ku ta pasando den momentunan difísil.

Promé Minister di Aruba Sra. Evelyn Wever Croes, i tambe Minister Dangui Oduber i direktor di VNO na Aruba, David Abrahams, tabata na aeropuerto momentu ku e kargamentu a yega. Segun informashon di Aruba, t’asina ku entrante djárason atardi lo entrega e vakuna na vários lokalidat.

Boneiru tambe a risibí vakuna ayera,. Pero no a hasi menshon ki dia nan ta kuminsá vakuna.
Awe ku buelo 735 di KLM e promé kargamentu di vakuna lo yega Kòrsou. Manera ya menshoná lo vakuna trahadónan den kuido i personanan riba 60 aña den e promé fase.