...sr. Roosburg di KSE ku e prosèsverbal su dilanti pa públiko tuma nota di dje...

WILLEMSTAD.- Awe Konseho Supremo Elektoral (KSE) ta fiha resultado di elekshon di dia 19 di mart último.
Ayera tabata último dia ku por a tuma nota di prosèsverbal di e reunion turbulento ku a tuma lugá dia 19 di mart último.
Nos di EXTRA a komprondé ku ayera tabatin dos persona a presentá pa mira e prosèsverbal. E prosèsverbal tin informashon di loke a tuma lugá den e reunion di siman pasá da 24 di mart, kaminda tabatin un reunion turbulento riba biyete di votashon blanku ku pretu.
Djaluna i ayera KSE a pone e prosèsverbal di e reunion públiko aki pa públiko tuma nota di dje.
KSE ta indiká ku pa kumpli ku stipulashon di artíkulo 91, insiso 1 di Reglamento di Elektoral di Kòrsou ta poné na konosementu di públiko ku presidente di KSE, ta pone e prosèsverbal di e seshon públiko di djárason 24 di mart, pa inspekshon públiko. Manera ariba indiká esaki a tuma lugá djaluna trai mèrdia, i ayera henter dia por akudí na WTC kaminda KSE ta situá pa tuma nota di e prosèsverbal.
Djaluna no tabatin hende a presentá pa wak e prosèsverbal. I ayera nos a komprondé ku tabatin dos persona di partido polítiko ku a bai tuma nota ki tabatin notulá den e prosèsverbal. Pasobra durante e reunion di dia 24 di mart, vários partido a pidi pa inkorporá loke a pasa den prosèsverbal.
KSE a stipulá awe djárason 31 di mart pa 10 or di mainta pa bai fiha resultado di elekshon di 19 di mart último. Atrobe votadornan por ta presente na e seshon aki.