Den sala di yegada na aeropuerto:

WILLEMSTAD. - Banda di e gastunan haltu ku biahamentu tin relashoná ku tèstmentu riba COVID-19, pasaheronan ku yega Kòrsou, prinsipalmente for di buelonan largu manera Hulanda, tin hopi problema ku e tardansa ku ta surgi na momentu ku nan baha for di avion pa registrá i paga pa e tèst Antigen ku ta un desishon di gobièrnu di Kòrsou. Tin pasahero ku ta informá ku nan tin di paga Antigen tèst promé ku pasa imigrashon. Pero tin hopi ku no sa i nan ta para den e rei di imigrashon promé i ora nan yega dilanti, ta manda nan e bali di ADC pa paga Antigen tèst.

Esaki tabata trese hopi disgustu pa e pasaheronan i otro aspekto ku tambe tabata trese  disgustu, ta e echo ku na e bali di ADC, no tabata aseptá euro, sino plaka lokal, dòler merikano i tarheta di krédito.

Den un komentario formulá pa redakshon di EXTRA, sra. Fayna Haseth di CAP a splika ku nan a tuma nota di e situashon i a traha rápidamente riba dje, pero mester a warda e bòrchinan keda kla.

Haseth a splika ku despues ku gobièrnu a tuma su desishon, nan komo CAP mester ahustá nan operashon. CAP na su turno a laga traha indikadónan (bòrchi) pa pone ora ku e pasahero baha, nan sa unda nan tin di pasa promé, esta na e “medical test area” di ADC pa paga e Antigen tèst.

E echo ku kada bes kosnan ta kambia dor di desishonnan tumá pa Gobièrnu ta pone ku tabatin pasaheronan ku no ta na altura di tur e kambionan.

Nan komo CAP semper ta keda ahustá i adaptá nan forma di operashon pa evitá tardansa i rei largu.

Awor e bòrchinan a keda kla i si tur kos kana bon, awe eseinan lo ta poné p’asina e pasahero baha for di avion nan kuminsá tuma nota ku e tin di pasa e “medical test area” di ADC promé.

Un otro aspekto ku tambe tabata sòru pa disgustu tabata e echo ku ADC no tabata aseptá tur forma di pago ni euro. Tabatin pasahero ku mester a buska manera di kambia nan plaka pa paga. ADC tabata tuma solamente dòler merikano i tarheta di krédito i plaka lokal.

Entrante awe esei tambe lo ta otro, esta ku ADC tin tur e formanan di pago i asina e pasahero por paga su tèst, sin problema. Esaki tambe ta un di e kambionan pa evitá tardansa den sala di yegada na aeropuerto.

Mester indiká ku CAP semper ta traha pa evitá tardansa, pero den e kaso aki no ta tur kos ta den nan man i e pagamentu di Antigen tèst ta den man di ADC (gobièrnu).

Mester indiká ku tur “stake holder” a yega na un forma pa pasaheronan no mester para largu den dos rei. Pues pa awe tur e ahustenan tantu di parti di CAP i tambe di parti di ADC lo tuma lugá, p’asina evitá tardansa innesesario.