WILLEMSTAD. - Durante e promé dia di tratamentu kaso Maximus den korte di apelashon eks minister di finansa George Jamaloodin (51) a bisa na vários okashon ku e no ta komprondé dikon ta akus’é di ta esun ku a duna òrdu pa mata Wiels a base di algun SMS ku tabatin entre e ku Nini.

Jamaloodin a keda sentensiá na 28 aña akusá di ta esun ku a paga pa asesiná e lider polítiko di Pueblo Soberano Helmin Wiels.

El a apelá su sentensia pa motibu ku e ta insistí ku ta kulp’é di algu ku e no a hasi.

El a akseptá ku bèrdat e tabatin kontakto ku Nini  na vários okashon via SMS. E a bisa ku nan tabata papia di asuntunan di sponsering, trabou, pero niun di e SMS nan por vinkul’é ku morto di Wiels. El a keda para riba ku e no tin nada di aber ku Wiels su morto.

Awe e kaso lo kontinuá kaminda lo bai skucha testigunan manera entre otro Nini Fonseca i Givenchi Maria ku a bin direktamente fo’i Hulanda. Maria ta sera riba e kas di “Hato Shooting”.