WILLEMSTAD.- Awe den rueda di prensa profeshonalnan den salubridat lo splika mas di e kambio di e vakuna di Pfizer pa Moderna.
Banda di esaki, awe tampoko e sentro di vakunashon na SDK ta kuminsá funshoná. Esaki ta loke ku minister demishonario di salubridat sra. Zita Jesus-Leito a duna di konosé na EXTRA.
E minister a indiká ku ayera un biaha mas, manera ta tuma lugá último tempunan, tabatin e kumbre entre e 4 paisnan di Reino, esta Kòrsou, Aruba, St. Maarten i Ulanda, kaminda a papia riba e plan di vakunashon.
Den e reunion a papia pa mas lihé posibel pa mas tantu hende posibel vakuná. Naturalmente mester di mas vakuna pa yega nos isla. Ademas a haña informashon for di Ulanda ku Pfizer ta stòp di bin Kòrsou i lo kuminsá ku Moderna. Pues nos lo sigui vakuná ku Moderna.
Nos ta haña vakuna for di Ulanda i nan tin e kantidat grandi di Moderna ku por manda pa nos i ta bai over na Moderna.
E minister no por a bisa nos di EXTRA pa ki tempu e vakuna di Moderna ta yega, pero lo ta mas pronto posibel.
Tambe el a indiká ku tur esnan ku a haña e promé prik di Pfizer lo haña Pfizer komo e di dos prik.
E islanan mas chikí di Reino, esta Saba i St. Eustatius a haña e vakuna di Moderna i ya nan a kaba ku e di dos ronda di vakuna ku Moderna.
Pa loke ta trata e sentro di vakunashon na SDK, awe esaki lo no por habri su porta pa vakuná manera anunsiá.
Awe lo tin konferensia di prensa kaminda lo elaborá mas riba e último desaroyonan di COVID i vakunashon kaminda lo ta presente epidemiólogo dr. Izzy Gerstenbluth, sra. dr. Iralice Jansen epidemiólogo i médiko dr. Jerry Semper.
Segun e sifranan di vakunashon te ku ayera mainta 10’or: a yega na 52.3888 hende ku a registrá pa vakuná. 24.613 persona a risibí e promé vakuna, i 9517 a risibí e di dos vakuna. Mester yega na inmunidat kolektivo.