Ta bai hasi investigashon rondó konstrukshon dje rampa

WILLEMSTAD.- Awe pa 11:30 minister Zita Jesus-Leito i minister Steven Martina lo duna mas klaridat riba e “mònster” (rampa) na Playa Kenepa, ku a kosta ku kabes di dos ámtenar na UO (Openbare Werken). Entre tantu a para trabounan dje rampa pa investigashon tuma lugá.

For di siman pasá e rampa ku ta ser konstruí na Playa di Kenepa ta den diskushon, spesialmente p’e echo ku e ta bin parti dilanti dje playa i ta daña su bunitesa. Playa Kenepa ta un di nos playanan mas bunita di Kòrsou ku nos ta hasi promoshon kuné.

E rampa aki ta ser konstruí pa fasilitá hende den rolstul por yega na e playa. Hopi hende no ta kontra dje rampa, pero e konstrukshon mahos parti dilanti dje playa.

Entre tantu dos siudadano Nihaila Pieter & Laeticia Xavora a kuminsá ku un “Petitie”  (akshon di firma) p’asina por laga kita e rampa aki ku ta daña e bista bunita di Playa kenepa. E akshon di firma ta bai pa minister Martina i minister Jesus-Leito.

E akshon di firma ta bisa lo siguiente: “Pa medio di e akshon di firma akí nos ke pidi bo koperashon pa konhuntamente nos yuda konservá un dje pèrlanan ku naturalesa a regalá nos esta, Kenepa Grandi. P'esei nos ta urgi bo firma e petishon akí pa medio di kua nos ta protestá enfátikamente kontra konstrukshon di un monstruo riba e playa number un i pa yu di Kòrsou.

Alabes nos ke enfatisá ku nos no ta kontra e inisiativa bunita akí pa krea posibilidat pa esnan desabilitá tambe por tin akseso na playa Kenepa. Sinembargo, nos no por aseptá ku ta hasi daño na naturalesa. T'asina ku ya tin un ruta eksistente ku por sirbí komo alternativa pa esnan desabilitá”. Te ku ayera nochi e petitie tabatin riba 4200 firma.

Djabièrnè último dos trahadó di UO den persona di Mac Cijntje i un otro trahadó a haña prohibishon di drenta tur lokalidatnan di UO.

Segun e desishon di prohibishon ta e ròl ku nan a hunga den konstrukshon ilegal (sin pèrmit) di e konstrukshon dje rampa. Pasobra nan a hasi òf krea e impreshon ku e rampa a haña aprobashon di minister i ku nan lo tin outoridat pa representá minister den konstrukshon dje rampa.

Mirando ku mester hasi investigashon, ta di gran importansia ku e dos trahadónan no ta na boka di trabou pa no stroba e investigashon. P’esei e prohibishon di entrada. Durashon dje investigashon lo ta 4 siman ku posibilidat pa prolongá esaki.

Segun informashon ku EXTRA ta disponé di dje ta ku minister Jesus-Leito no tabata envolví den konstrukshon dje rampa, solamente e sitio di parker ku for di yanüari a kuminsá na drecha.

..Riba kombinashon di foto saka ku drone di nos kolega Riley Ignacio, por mira for di diferente ángulo e konstrukshon dje rampa i bista dje playa...

Kenepa