WILLEMSTAD.-Awe a tuma lugá e findishi riba sierto lote di krudo ku tabatin den tankinan na Bullenbaai. Ta trata di lotenan di krudo, propiedat di PDVSA, ku ta den 4 tanki diferente di Curaçao Oil Terminal (COT). ‘E benta a bai hopi bon. RdK mes a kumpra e krudo.”. Na palabra direktor interino Marcelino de Lannoy den deklarashon na EXTRA.

Riba e pregunta di EXTRA kon bin Refineria di Kòrsou mes a kumpra lotenan di krudo ku nan mes tabatin beslag riba dje, de Lannoy a splika ku awor nan, esta RdK ta liber pa meskla i traha un batch pa benta den eksterior.

Mas aleu el a splika ku no ta tur loke ku tin den inventario di tankinan tin beslag riba dje. Ademas RdK mes tin krudo i tambe produkto. RdK ta doño kaba di diferente lote chikitu di krudo, anto awor ku RdK a bira doño di e lote mas grandi di krudo nan por traha un pakete mas grandi pa benta di e krudo, mesklando ku loke ya kaba RdK tin den diferente tanki huntu.

Hasiendo esaki e kompania lokal, estatal por generá mas riba merkado grandi ku e benta di e produkto.

Awe mainta ta bende lote krudo na findishi

WILLEMSTAD.-Awe mainta deurwaarder Ramazan ta bende un lote di krudo ku ta den tankinan di Refineria di Kòrsou na findishi, riba enkargo di refineria di Kòrsou. Ta trata di krudo di PDVSA kual RdK a tuma den beslag pa falta ku pago di parti di PDVSA.

E benta ta plania pa tuma lugá awe mainta unda lo bende 188 barí di gas oil, 2304 barí di Blend Crude oil, 27.603 barí di Blend Crude Oil i 167.866 barí di Crude Oil Sta.Barbara. E benta ta tuma lugá den Club De Oleander na Weg naar Welgelegen. E diferente produktonan menshoná ta wardá den kuater tanki diferente na COT na Bullenbaai.

Kada ken ku ofresé pa partisipá den e findishi mester presentá un garantia di banko òf otro tipo di seguridat. For di momentu ku kumpra e produkto tur rísiko ta kore pa kuenta di e kumpradó, esaki ta enserá kubri gastunan di almasenahe na Bullenbaai. E kumpradó mester pèrkurá pa regla pa pòmp tur produkto pa un tankero ku mester transportá e produkto.

Algun luna pasá RdK a laga pone beslag riba tur produkto den tankinan i awor ta bende esakinan den findishi.