WILLEMSTAD. - Tur loke ku e direktora anterior a traha duru p’e i a duna Stichting Slachtofferhulp Curaçao un lugá prominente den komunidat, a bai tirá afó den un fregá di wowo, esaki ta loke ku por dedusí for di fuentenan hopi yegá ku e fundashon a splika EXTRA. E reklamonan no ta solamente di parti di víktimanan (kliente) ku tur dia ta eksperensiá trato di nivel inferior, pero e reklamonan ta bin tambe di agentenan di Kuerpo Polisial i otro instansianan profeshonal ku ta traha ku e fundashon.

Na e momentunan aki e maneho di Stichting Slachtofferhulp ta karesé di  profeshonalismo, kreatividat i determinashon, loke ku ántes e fundashon tabata riku na dje.

Tin indikashon fuerte for di nos fuente ku direktiva di e fundashon ta poniendo preshon riba Minister, pa motibu no a honra nan petishon pa haña mas plaka pa e trabou ku nan ta hasi pa e fundashon.

Den e temporada di e direktora anterior ku a traha hopi aña ku e fundashon, tabatin trato pa e víktimanan, e direktora huntu ku su tim a bringa pone e fundashon riba pia pa awe ta laga tur kos bai kaba na nada.

E fundashon ta drai ku masha tiki hende i no tin rekurso pa e profeshonalnan traha kuné.

Resientemente den korte a bin dilanti ku fundashon no ta presentá mas ku e víktimanan den sala di korte penal pa apelá riba daño i perhuisio, kaminda ku lei ta bisa ku e víktima mester keda poné na altura ku e kaso ku el a bira víktima ta keda tratá i ku e víktima por pidi un daño i perhuisio.

Na vários okashon den pasado, hues a suspendé tratamentu di kaso, ora ku Ministerio Públiko pa un motibu òf otro no a notifiká e víktima pa e ta presente den sala di korte durante e tratamentu di e kaso di e sospechoso kompaña pa profeshonalnan di Slachtofferhulp.

Awor aki, simplemente e direktiva di e fundashon mes a stòp e profeshonalnan bai korte ku e víktimanan pa sali na defensa di e interesnan di e víktimanan.

Esaki ta pone ku e víktimanan ta reklamá e trato ku nan ta haña.