WILLEMSTAD.- Awe ta kumpli eksaktamente dos aña di e asesinato di 5 persona pareu den Jamaicaweg. Un dia konsiderá komo un mancha pretu riba Kòrsou. Te ainda den historia si Kòrsou, tabata promé biaha di un asesinato di 5 persona pareu.
Riba e fecha 7 di ougùstùs 2017, tabatin selebrashon di kumpleaño di dos ruman ohochi den Jamaicaweg.
Den oranan di anochi, sentral di polis a haña notifikashon ku tin un tiramentu den e kaya enkuestion na altura di un edifisio ku no ta den uzo i ku tin diferente herido. Na yegada di e promé patruya polisial a topa un kantidat di persona drumí abou na e sitio indiká i den bisindario. For di un investigashon preliminar ku polis a realisá na e sitio, nan a haña informashon ku un ratu promé un grupo di hòmber tabata sintá den e balkon di e edifisio i dado momento un outo koló skur a yega na e sitio i un òf mas persona a baha for di e outo i a lòs un kantidat grandi di tiru dirigí riba e grupo di hòmber aki i otro (nan) den serkania.
Despues di e akto e outo a kore bai ku velosidat haltu. Resultado di e tiroteo aki a laga un saldo di kuater (4) víktima (maskulino) ku a fayesé na e sitio mes. Seis (6) otro víktima (maskulino) di respektivamente 26, 28, 31, 34, 50 i 52 aña di edat a haña herida di bala na diferente parti di nan kurpa i a keda transportá ku urgensia pa Poliklínika di hospital pa asistensia médiko di kual unu tabata hopi grave.
E víktimanan a keda registrá komo :
Ethly Albertus Jr. nasé na Kòrsou 26 sèptèmber 1989,
Jose Luis Belen, nasé na Sto. Domingo 7 ougùstùs 1995 i su pia di ohochi
Luis Jose Belen, nasé na Sto. Domingo 7 ougùstùs 1995.
Franklin Elias Pieters, nasé na Kòrsou 22 di ougùstùs 1987.
Dos dia despues di e asesinato djárason 9 ougùstùs den oranan di mèrdia, polis a risibí notifikashon di hospital ku 12.23’or dòkter a konstatá morto di e hòmber/víktima Ramsis Egberto Sintjacoba, nasé na Kòrsou 24 aprel 1965.
Pues e momentu ei a yega e total di 5 víktima ku a pèrdè nan bida den e tiroteo ku a keda duna e nòmber di “Jamaicaweg”. Na e sitio polis a haña i konfiská un kantidat grandi di ‘huls’.
Dia 7 di ougùstùs mes mas lat a drenta informashon ku na altura di Shut tin un vehíkulo ku probablemente e sospechoso (nan) a uza na e asesinatonan na Jamaicaweg na kandela. Polis a bai na e sitio i a konstatá ku en bèrdat tin un vehíkulo na kandela. Despues di e kaso di asesinato kruel aki, polis a konfirmá pa EXTRA ku Kuerpo Polisial di Kòrsou bou di liderazgo di Ministerio Públiko a lanta un tim spesial ku a haña e nòmber Team Grootschalig Onderzoek Jamaicaweg (TGO Jamaicaweg).
Segun e investigashon tabata kana a skucha vários testigu miéntras a hasi investigashon tékniko na e sitio. Aña pasa riba e mesun fecha aki, EXTRA a kombersá ku miembro di un di e famianan ku a indiká nan ta sinti hopi falta di informashon ainda i prinsipalmente akshonnan ku mester keda tumá. For di despues di e krímen, algun biaha reshèrshinan a presentá na e kas pa asina papia ku e miembro di famia na kabes pero nada no a bin afó te ku e dia di awe. Famianan a koperá i duna tur informashon ku reshèrshinan a pidi pero no a mira niun adelanto den e investigashonnan.
Te ku e dia di awe, ainda famianan ta bringa ku e doló di pèrdida di nan ser kerí i mas ainda debí ku esun òf esnan kulpabel pa a kita bida di e sinku hòmbernan ainda no ta detené. Ounke ku dos aña a pasa, tòg famianan ta spera ku outoridatnan lo tuma e kaso un tiki mas na serio i aktua kontra di esun òf esnan responsabel promé ku otro aña mas mester bòltu.
Laga un komentario