WILLEMSTAD,- Minister di Tráfiko, Transporte i Planifikashon Urbano (VVRP) Zita Jesus-Leito ta informá tur doño di bòrchinan di propaganda ku entrante awe, 6 di yüli 2018, ta kuminsá kita bòrchinan òf otro opheto di propaganda komersial, ku doñonan no a kita den e tempu stipulá, riba kosto di e persona ku a violá e lei di Òrdu Públiko. 

Konforme e lei di Òrdu Públiko (Landsverordening Openbare Orde (LOO)), ku a drenta na vigor dia 1 di ougùstùs 2015, ta prohibí pa pone bòrchi òf otro ophetonan di propaganda komersial den, riba, kantu di, òf visibel for di kaya públiko sin un pèrmit i/òf eksonerashon di Minister di VVRP.

Doñonan di bòrchi òf otro ophetonan di propaganda komersial a haña e oportunidat pa nan mes kita nan bòrchi òf otro opheto di propaganda komersial den e término stipulá riba e steker ku instansianan konserní a pega. Riba e steker tin fecha skibi di e dia ku a plak e steker. Personanan a haña e oportunidat di dos siman despues di e fecha, pa nan mes kita nan bòrchi òf otro opheto di propaganda komersial. Si dado kaso esaki no a tuma lugá, ta kita tur bòrchi òf otro opheto di propaganda komersial, ku no a kitá den e tempu stipulá, riba kosto di e persona ku a violá e lei di Òrdu Públiko. 

Den un komunikado di prensa minister Zita Jesus-leito ta bisa ku: ‘Bou di ningun sirkunstansia Gobièrnu no ta responsabel pa dañonan na e bòrchi òf otro ophetonan di propaganda komersial ku Gobièrnu kitá. No ta permití pa kita e steker ku wòrdu di plak riba bòrchi òf otro ophetonan di propaganda. Personanan mester tene na kuenta ku tur bòrchi òf otro ophetonan di propaganda ku risibí un steker ta wòrdu registrá.’