WILLEMSTAD.- Awe dia 10 di desèmber ta kumpli un aña ku Girobank a disidí di vris tur kuenta, pone tur akshon na punto sero, mirando ku e banko tabata bayendo di malu pa pió. Hopi ta esnan ku te awe a keda pèrdí di nan plaka, prinsipalmente esnan ku tabatin montantenan grandi depositá na e banko aki ku a bira víktima di un maneho erátiko di Eric Garcia. Awe despues di un aña ya por bisa ku e banko ofisialmente a stòp di eksistí.

Hopi diskushon a surgi i hopi malkontentu tabatin e tempu ei komo ku klientenan di e banko a sinti nan mes kompletamente traishoná, ya ku ta simplemente a lanta un dia i paralisá tur kos. Kompanianan grandi ku si a haña tep di oro for di Banko Sentral a sòru pa lanta nan plaka, pero e hòmber chikí a keda atras atrobe.

Despues di algun dia di tenshon, Banko Sentral a Sali i informá dje pasonan ku a tuma i kiko ta e posibilidatnan pa por lanta plaka. Den e kaso aki Banko Sentral pa motibu ku Girobank tabata bou di kuratela.

A permití klientenan chikí pa lanta entre 1.000 i 10.000 florin, miéntras ku e sobrá plaka a keda di vris. Teniendo kuenta ku e kantidat di kliente, Banko Sentral a garantisá e máksimo di 10.000 florin pa kliente. Otro inhustisia grandi den esaki tabata ku klientenan lo por tabatin plaka (di vris) na Girobank, pero a eksigí si pa nan sigui paga fiansanan i otro obligashonnan separá for di loke nan tabatin depositá na e banko. Mester a sigui paga hipotek normalmente, i si bo disidí di likidá e fiansa mas tempran numa lo bo a haña un but.

Es mas, no por a sigui usa tarhetanan di krédito di Girobank mas ya ku esakinan tambe a keda blokiá.

Den promé instante no tabatin akseso pa e sistema di online tampoko sino te dia ku tempu a klara.

Finalmente un grupo di siudadano ku a yama nan mes “de gedupeerden” a kuminsá entamá pasonan konkreto pa bai korte pa nan por disponé di nan plaka, pero no tin masha kos a bin afó. Awe ofisialmente Girobank no ta eksistí mas.