Silvania: Loke kasino online mester paga pa pèrmit no a bira mas tantu

Kontinuando ku e desaroyonan rondó di petishonnan pa pèrmit pa kasino online EXTRA a puntra e minister Silvania kon e por splika e preokupashon di e sektor pa loke ta trata oumentu di gastunan. ‘E suma ku un kasino online mester paga pa haña pèrmit no a subi, e ‘fee’ a keda mesun kos.” Na palabra minister Silvania den deklarashon na EXTRA.

E minister a sigui bisa ku no mester wak e ‘fee’ so, pasobra tin hopi otro detaye mas ku ta di importansia. Mester wak tur e gastunan embolbi pa haña un lisensia Un kompania di online gaming registrá na Kòrsou no mester paga kasi nada na belasting riba ganashi. Den e situashon nobo kaminda e kompanianan mes por pidi e pèrmit direktamente na Gaming Control Board ta nifiká ku el a skapa di paga intermediarionan manera ofisinanan di trust i master license holder. Na momentu ku un kompania asina pidi i haña su pèrmit direktamente for di Gaming Control Board i mas importante ainda, gobièrnu di Kòrsou ta haña mas entrada kompará ku e situashon aktual.

Proyekto di lei den preparashon pa rifero i otronan por haña banko pa traha kuné

Otro punto ku EXTRA a pidi atenshon di e titular di finansa ta e problema ku empresanan tin pa haña kuenta di banko. Kòrsou tin wega di number legal i sinembargo bankonan por ninga un kliente ku tin negoshi di bende number legal, pa habri un kuenta. Por sierto e organisashon di kompanianan den sektor finansiero internashonal tambe a mustra nan preokupashon pa esei. Den e kuadro aki sr. Silvania a duna di konosé ku bèrdat bankonan lokal no ta aseptá kliente di online gaming, ni riferonan ni kompanianan den Freezone. Pa esaki gobièrnu a traha riba un proposishon di lei ku ya kaba ta kanando su kamindanan pa asina por bini ku solushon pa e problema aki.

50 kasino online a registrá den apénas 2 dia

WILLEMSTAD.-Minister di Finansa sr. Javier Silvania a informa, via di retnan sosial, ku den apénas 2 dia un kantidat di 50 kasino online a registrá pa asina nan por haña lisensia di Curaçao Gaming Control Board. Ta asina ku den kuadro di e lei LOK (Landsverordening op de Kansspelen) ku ta regulá weganan di hazar (kansspelen) na Kòrsou kompanianan por registrá na Gaming Control pa haña nan lisensia dirèkt na lugá di via di un asina yama ‘master license holder’.

Grupito so tabatin benefisio

Den kontakto ku e titular di finansa el a mustra gran satisfakshon ku e sektor di kasino online a reakshoná asina positivo riba e kambionan ku Kòrsou ta implementando. ‘Direktor i doño di kasino ta kontentu ku awor nan por hasi petishon pa pèrmit na GCB. Ta ken ta krítika? Ta esnan ku a gana bòshi plaka riba lomba di online kasino sin kontribuí den kaha di gobièrnu. E rikesa a bai den saku di un grupitu, pero pueblo di Kòrsou no a benefisiá di e industria ei. Awor e online kasino tin ku paga gobièrnu pa e haña pèrmit i no na ‘master license holder’ òf trustkantor.” Na palabra minister Silvania.

Resientemente EXTRA a tuma nota ku a lanta un organisashon di ofisinanan di trust i otro empresanan ku ta brinda servisio den e sektor finansiero internashonal. Nan a ekspresa preokupashon serio pa e echo ku gobièrnu i Gaming Board no ta envolví e sektor sufisientemente i na tempu di e kambionan plania. Ta durante di seshon di informashon nan a keda konfrontá ku tur loke Gaming Board i e minister a traha riba dje kaba. E organisashon ta di opinion, segun un informe ku nan a publiká, ku oro hurisdikshonnan tin sektor bankario ku ta ofresé servisionan spesialisá na e sektor di online gambling miéntras ku na Kòrsou esei no ta e kaso. No tabata posibel haña mas detaye di e organisashon pa asina por informa mas aleu.