WILLEMSTAD – E Asosashon di Restorant di Kòrsou (CRA) ta spera awor ku meskos ku a permití kasino nan habri bek ku esaki un djis lo konta tambe pa restorantnan. E speransa ta ku riba término hopi korto ku esaki lo tuma lugá. Despues ku a alarga e medidanan relashoná ku Covid-19 te ku 11 di yanüari awor a hasi un adaptashon pa kasinonan. Aparentemente segun CRA tabatin espasio pa relahá despues di konsulta ku e sektor.

Pa kasino ta konta ku un kliente por keda te un máksimo di dos ora den e establesimentu.  For di esaki por konkluí segun CRA ku ta posibel pa mas persona pa periodo mas largu keda huntu den lugá sera. Pa e motibu aki CRA no ta komprondé pakiko esaki no ta posibel pa restorantnan tambe.

CRA ta lamentá ku no tin konsulta entre e sektor i e tim di krísis. E nesesidat serka restorantnan ta grandi i ta dispuesto pa koperá di tur forma. “No por ta asina ku ta midi ku dos midi, si por permití kliente den un establesimentu pa bai hunga plaka anto e ora ei por hustifiká tambe pa restorantnan habri nan porta bek pa laga nan klientenan sinta kome.

CRA ya a aserka gobièrnu ku e asuntu aki i ta spera ku riba término korto un reakshon. “E speransa ta grandi ku e sektor aki ku ta sufriendo inmensamente tambe por risibí relahamentu di medida mas pronto ku ta posibel.”