WILLEMSTAD.-Banko Sentral di Kòrsou i Sint Maarten den un informe ofisial ta anunsiá ku for di kuminsamentu di e siman aki GI-RO Settlement Holding NV (GSH), ku ta atendé pago di klientenan di e banko, a kita restrikshon pa lanta plaka for di e kuentanan. Pues doñonan di kuenta por dispone di nan plaka te un maksimo di 1.2 mion florin.

GSH ta hasi apelashon i ta rekomendá klientenan pa mas tantu posibel hasi uso di online banking i tambe formularionan di transferensia pa move nan plaka di Giro pa otro banko. Naturalmente ta posibel pa lanta plaka kèsh na ATM. Mester tene kuenta ku orarionan adaptá i debí na medidanan di Covid tin ménos personal trahando loke por pone ku transakshonnan ta dura mas largu ku normal.

Girobank ta habri di djaluna pa djabièrnè di 8’or mainta pa 12’or di mèrdia. Por bishita un filial solamente ku un sita, pa traha sita por mail info@gironet.com òf yama tel: 4339130. Mas detaye den edishon di EXTRA.

https://extra.cw/banko-sentral-pronto-lo-paga-depositonan-na-girobank-te-un-maksimo-di-naf-1-200-000/