WILLEMSTAD – Un kaso insolito a tuma lugá kasi den oranan di yegando mèrdia den área di Promenade i pa ta mas spesífiko na e skol UDC ubika den e lanthùis Groot Davelaar. Un hóben alumno ku tabata para den e kura di e skol a keda atraká òf tabatin intento di atraká pa kita su kadena for di dje. E atrakadornan a kore yega den un KIA Picanto i a trata na kita un kadena for di e studiante. Aki tòg un área basta drùk ya ku semper tin studiante ku ta kaba skol òf kaba ku lès i tin e tráfiko di e sentro komersial Promenade djis einan. Polis a yega na e sitio i tuma deklarashon di e víktima studiante i a saka un alerta pa búskeda di e KIA Picanto kolo blanku.

University of the Dutch Caribbean (UDC) awe tardi riba media sosial a reakshoná riba e insidente. UDC ta bisa ku no tabatin atrako. Segun UDC un persona deskonosí a purba di kue kadena for di un studiante. “Pero e studiante a drenta skol bèk i nada no a pasa”, segun e universidat ku a tuma kontakto ku polis. A duna polis number di plachi di number di e outo di e persona ku a purba di kue e kadena. Segun UDC semper tin vigilansia riba tereno di skol i den e último 25 aña nunka tabatin problema.